Agrikultór Maliana hahú halai natar faze dahuluk 2024
BOBONARO, 08 janeitu 2024 (TATOLI)-Agrikultór sira iha postu administrativu Maliana, munisípiu Bobonaro hahú semana dahuluk fulan ne’e, idak-idak ho tratór fila-rai iha natar pertense Soso, hodi prepara atu kuda hare faze dahuluk ba époka 2024.
Agrikultór Suku Holsa, Feliciano Lopes, informa, tuir loloos hahú fila-rai iha fulan-novembru tinan kotuk, maibé la konsege tanba udan- been mai tarde.
Notísia relevante: Natar ektare rihun 13-resin iha Maliana abandona
“Tratór ne’e ami aluga de’it, hahú horisehik ami komesa fila-rai, loron ida rua tán hotu ona, ami book-aan lalais oituan, semana oin hanesan bele butuk ona hare, molok to’o fulan-marsu kuda hotu ona, tanba tinan ne’e udan been ladi’ak, bee iha natar menus la hanesan uluk, sé ita tarde hare laiha, tanba durante ne’e ami halo natar garantia de’it ba udan-been,” nia informa ba Tatoli, iha natar Soso, Maliana, segunda ne’e.
Nia rekomenda ba Governu atu kontinua tau-matan bainhira hetan ameasa hosi pesti.
“Karkól ne’e mak durante ne’e halo ami tauk oituan, buat ne’e mak tama dala-ida konta ita na’in haree de’it ona, tanba ai-moruk laiha atu hamate ne’e, ami ba sosa moos laiha, ne’ebé sé bele Governu prepara hela ba,” nia fó hanoin.
Filomena de Jesus, nu’udar natar-na’in hosi suku Tapo-Memo, dehan, tinan ne’e sira la garante produsaun hare sa’e ho razaun volume udan-been ladún di’ak.
“Tinan kotuk, ami-nia natar iha parte leten ne’e, hetan rezultadu di’ak, tanba momentu ne’ebá udan-been mos maka’as, hare moris mai ne’e futun boot hotu,” nia katak.
Komunidade agrikultór ne’e husu ba Diresaun Servisu Munisipál Agrikultura Munisiípiu Bobonaro, liuliu Ministériu Agrikultura, Pekuária, Peská no Floresta atu projetu konstrusaun irrigasaun Maliana II, hodi bele fornese bee natar iha suku Holsa, Odomau no Tapo-Memo.
“Irrigasaun ne’e aat, kada tinan ami halo natar dalan ida de’it, tanba hein mak udan-been de’it ne’e, sé irrigasaun ne’e di’ak,” nia hateten.
Tuir dadaus hosi Ministériu Agrikultura, Peska, Pekuária no Floresta (MAPPF), katak natar iha postu administrativu Maliana iha ektare 7,662. Hosi númeru ne’e iha tinan 2022 área kultiva 5,544 mak ativu ho nia rezultádu produsaun kada ektare tonelada haat.
Notísia relevante: Peste Karakol hahú ataka natar ektare 300 iha Maliana
Jornalista: Sérgio da Cruz
Editór: Evaristo Soares Martins
