Hakerek-na’in: Aurea Ximenes de Andrade*)
Rikusoin ne’ebe úniku no folin boot iha moris mak família. Família mak grupu kiik ida-ne’ebe kompostu hosi Aman-Inan no oan sira. Nu’udár grupu kiik, família rasik iha nia papel no prinsípiu atu membru ida-idak bele moris tuir saida mak família nia plauo ba moris saudável. Papel no prinsípiu hotu ne’ebé eziste iha família ida-nia laran atu garantia família ne’e hodi moris iha ámbitu ida responsável, hakmatek, pás no domin iha relasaun sosiál.
Tuir fiar nu’udar ema kristaun nian, família mak sai hanesan Igreja kiik ida-ne’ebe moris iha santidade nia laran katak moris iha fiar ida no neon ida, hodi partilla kona-ba lia-fuan no domin Maromak nian. Família ne’ebe santu mak família ne’ebe buka moris tuir domin loloos Kristu nian.
Saun João Paulo II ko’alia mos aspetu ida-ne’e iha ninia karta Exortação Apostólica Famíliares Consortio, katak “Maromak kria ema sai ilas ida no oin ida atu hanesan Maromak (Gn 1, 26): bolu sira ba moris tan domin, bolu sira mós ba domin. Maromak mak domin (1 Jo 4, 8) no moris iha nia aan rasik mistériu ida moris hamutuk iha domin. Mak halo ema ba nia ilas no konserva ema-ne’e nafatin nu’udar ema moris ida, Maromak haktadak iha hun ema mane no feto vokasaun ida, nune’e fó kbiit no reponsabilidade domin no moris hamutuk nian ba sira (cf. “Gaudium es spes”, 12). Domin mak hun lolos ema ida-idak nia vokasaun” (FC 11).
Kabe ba situasaun atuál ohin loron ne’ebé mak akontese iha sosiedade liuliu ba moris família nian, família barak moris hasoru dezafius oioin ho tadak modernizasaun iha mundu konteporanea ida-ne’e, hodi halakon tiha sira-nia relasaun fundamentál hosi integrasaun domin nian nu’udar família, no halai sees hosi ukun-fuan domin loloos Maromak nian.
Ita haree situasaun ohin loron, família barak naksobu to’o sai rahun tanba aman la hatene nia papel fundamentál nu’udar aman hodi bele orienta oan sira moris iha edukasaun ida ho dignu. Aman sira barak mak haluha ona halo komunikasaun ho oan sira hodi fó solusaun ba oan sira-nia problema. Inan sira mós ohin loron haluha sira-nia papel fundamentál nu’udar inan loloos, hodi ajuda nia parseiru hodi tau matan ba oan sira.
Nune’e mós, oan sira, la’o la tuir ona orientasaun família nian, la buka no moris tuir inan ho aman nia lia-fuan, la rona no la hakarak hodi buka kompreende situasaun família, la tulun inan-aman no mós lakohi halo komunikasaun ho inan-aman kona ba sira nia problema ne’ebe sira hasoru iha sira-nia jornada moris nian. Oan balun hakarak loos moris hamutuk ho família no hakarak moris iha felisidade maibé tanba ho relasaun fahe malun ka divorsiu hosi inan-aman, halo sira la sente haksolok. Hosi situasaun hirak ne’e hotu, hatudu katak família Timor-Leste (TL) tama tiha iha dezastre no tama iha krize komunikasaun profundu moris nu ‘udar família nian.
Tanba ne’e, proposta Concílio Vaticano II nian, iha Constituição Pastoral Gaudium es spes, ko’alia kona-ba problema sira-ne’ebe urjente no hodi fó promosaun dignidade matrimóniu no família nian, hanesan hatudu iha ninia diskrisaun kona-ba valór família nian atu harii sosiedade ida: “Familia; iha ne’ebe halibur jerasaun sira be la hanesan, tulun malu ba hodi hetan matenek ida nakonu liu no hadame ema nia direitu sira ho ezijénsia sira seluk iha vida sosiál ka harie familia, nune’e mak hun ba sociedade” (GS 52).
Liu-liu apelu ida makaas tebes ba espiritualidade ida Kristoséntrika (Kristu Mak Sai Sentru ba Família) hato’o ba kaben-na’in fiar nain sira: “Ema kaben-na’in sira rasik, Maromak halo tiha oan sira ho Nia ilas no Imajen rasik, ilas Maromak nian no harii tiha ona sira tuir ordem ema lolos, moris hamutuk iha domin ida deit, hanoin ida no tulun malu iha santidade, nune’e, tuir Kristu, be moris hun, hodi fiar metin iha nia domin, liuhosi ksolok no sakrifisiu iha sira-nia vokasaun, fó testemuña ka sasin ba Maromak nia minstériu domin……(GS 52).
Tuir Komunikadora ida ho naran, Sacrinha dehan nune’e; ‘’Quem não se comunica se trumbica’’ ho liafuan simples katak ema-ne’ebé lakohi halo Komunikasaun mak sei halo aat, ka sei prejudika relasaun fundamentál iha relasaun úmano ka ema-nian. Komunikasaun hanesan meiu ida importante tebes iha relasaun úmanu, liu-liu iha relasaun fundamentál família nia laran. Laiha komunikasaun mak família sei la haksolok no loiri família ne’e sei nafatin moris iha konflitu ida-nia laran.
Iha pontu importante lima (5) ne’ebé mak harahun relasaun intimidade komunikasaun iha família mak hanesan;
- Lakohi atu rona. Signifika, iha família nia laran aman lakohi buka rona atu kompreende inan nia hakarak, inan mós lakohi buka kompreende aman-nia hakarak, oan sira la kohi buka rona inan-aman, nune’e mós inan-aman lakohi rona no buka kompreende oan sira nia hakarak. Aman ho inan uza sira-nia poder atu ukun família maske sira-nia hahalok la tuir buat ne’ebé loos.
- Silénsiu ka nonook de’it. Signifika, wainhira mosu dezentendimentu entre inan-aman no oan, sira lakohi ko’alia ba malu maibé nonook de’it hodi foti desizaun hodi harahun família.
- Signifika, aman-inan ho oan ne’ebé moris iha família uma laran lakohi ko’alia ba malu ho neineik, sempre hakilar malu ho lian makaas, hodi hasai lia-fuan ne’ebe la merese atu ko’alia hanesan lia-fuan tolok, tarata malu no liafuna kro’at sira seluk-seluk tan.
- Fó importánsia ba telemovel. Signifika, inan-aman, oan maske moris no hela hamutuk iha uma laran ida maibé sira la ko’alia ba malu maibé sira ida-idak tuur hakmatek iha sira-nia fatin ida-idak hodi haree sira ida-idak nia telefone, buka dada-lia ho ema ne’ebé dook no fó importánsia ba ema-ne’ebe dook, duké fó importánsia ba família—ida-idak halo ninian hanesan iha uma laran laiha “ukun” no “bandu”.
- Lakohi komunika. Signifika, lakohi atu ko’alia no lakohi atu konversa ho família hodi fó solusaun ba problema família ka problema uma laran.
Hosi ne’e, bele deskobre katak moris iha família sempre mosu hanoin lahanesan no hakarak mós lahanesan, maibé ida-ne’ebé sai esensiál mak buka atu halo komunikasaun ida di’ak ba malu atu bele kompreende malu ho di’ak, atu nune’e bele fó desizaun ida-ne’ebé di’ak no klaru ba moris família nian.
Tanba ne’e, hanesan saida mak haktuir hosi Fátima Nascimento iha nia píjina Coach dehan nune’e; “família e um grupu de pessoas, cheios de defeito, que Deus uniu para que convivam com as diferenças e desemvolvam a tolerância, a benevolência, caridade, o perdão, o respeito, a gratidão, a paciência direito e dever, limites enfim, para que aprendam a amar incondicionalmente”.
Hanoin ida-ne’e atu dehan mai ita nune’e; Maromak halo ema moris iha família, halibur ema iha família ida ho hakarak la hanesan, frakeza la hanesan, hanoin lahanesan, maibe oinsá ita buka atu bele fó solusaun mak tenke moris iha toleránsia no moris iha perdaun, respeitu, pasiénsia no limitasaun, hodi aprende moris iha domin ida inkondisionál ne’e rasik (unconditional love).
Kabe ba razaun hotu ne’ebé iha, mak iha ne’e presiza solusiona ho solusaun ba problema familiár mak ita tenke kuda ámbitu importánsia komunikasaun iha família; inan-aman, tenke sai ezemplu dahuluk iha família, buka kompreende malu, halo komunikasaun ba malu nafatin, wainhira hasoru dezafiu iha relasaun umana hanesan moris kazál nian, hodi nafatin hametin sira-nia fidelidade ba malu iha família.
Buka orienta oan sira atu moris iha domin, iha responsabilidade no atu nune’e oan sira bele sai oan ne’ebé iha maturidade no independente, respeita ema seluk, hadomi ema seluk, buka nafatin atu komunika ho oan sira ho lian ne’ebé neneik kona-ba sira-nia situasaun no aktividade sira. Tau importánsia ba sira, halo sira moris iha liberdade no moris iha haksolok. Oan sira mós buka kompreende no moris tuir orientasaun família nian ne’ebé loos, buka kompreende situasaun família ninian, respeita inan-aman no buka kompreende situasaun inan-aman ninian no seluk tan.
Família ne’ebe haksolok mak família ne’ebé kuda importánsia relasaun fundamentál liuhosi komunikasaun ka partilla ba malu ho konfiansa hodi buka solusaun ba konflitu família ninian, hodi moris iha sosiedade no nasaun ida-ne’ebe nakonu ho pás, unidade no amizade.
Hanesan Madre Teresa hosi Kalkuta haktuir nune’e: Quer fazer algo pela paz mundial? Vá para casa e ame a sua família. Mai, ita nafatin hadomi ita-nia família, fó tempu ba ita-nia família, ko’ alia, partilla kona-ba esperiénsia, sai tolerante, hatene moris iha perdaun iha família, atu nune’e lori família moris iha domin no fó kontribuisaun ba pás iha família, sosiedade, nasaun no ba mundu. A todos família, Meu Feliz Ano Novo. “Com Carinho”.
*) Hakerek-na’in daudaun ne’e hakna’ar-aan nu’udar ofisiál DE Justisa iha Tribunál Distritál Dili (TDD).
