Diretór eskola husu ME tau atensaun ba EBF Taur Matan Ruak
DILI, 23 janeiru 2024 (TATOLI)—Diretór Eskola Bázika Filiál (EBF) Taur Matan Ruak Lahane Orientál, Alvaro de Deus, husu Governu liuhosi Ministériu Edukasaun (ME) presiza tau atensaun ba EBF Taur Matan Ruak, tanba profesór na’in-ualu (8) de’it mak hanorin estudante hamutuk 364.
“Uluk ami iha profesór na’in-10 maibé ida moras no ida seluk transfere sai ba fatin seluk tiha, entaun hela na’in-ualu inklui ho ha’u, nune’e na’in-haat hanorin dadeer no na’in-haat seluk hanorin lorokraik. Ida-ne’e defisil ita kontrola,” nia hateten ba Agência Tatoli iha EBF Lahane Orientál, tersa ne’e.
Tuir nia, alunu barak loos no kada sala aula iha alunu ema na’in-60 maibé iha primeiru ano ne’e iha alunu iha ema na’in-64, segundu ano iha 62 no fahe ba turnu rua.
Iha terseiru ano mós fahe aluni sira ba turnu rua ho kada sala alunu iha na’in-32, kuartu ano iha alunu 52 ne’ebé akumula iha sala ida de’it, kintu ano mós alunu ema na’in-52 ba sala ida no sestu ano iha alunu na’in-62 ba sala ida mós.
“Ami tenke halo ba sala ida tanba ita-nia profesór mak menus, entaun labele haree kualidade tanba labarik barak no sena malu no susar atu kontrola,” nia dehan.
Maske professor menus maibé nia nafatin garante profesór iha nia kualidade no alunu kada aula to’o na’in-60, sira esforsu atu oinsá mak bele hanorin no estudante bele komprende ho di’ak.
“Estudante barak profesór tenke esforsu tanba hakarak ka lakohi ne’e, kna’ar ida nune’e tenke buka meiu ida para bele halo estudante komprende,” nia hateten.
Reprezentante inan-aman, Pasquela Maria de Jesus, preokupa ho profesór menus tanba bele prejudika ba prosesu aprendizajen iha sala-de-aula, nune’e hanesan inan-aman alunu sira-nian hakarak rekomenda ba ministériu edukasaun atu toma atensaun no tenke aumenta profesór.
“Ministra Edukasaun tenke tau matan ba asuntu ne’e tanba labarik mak futuru ba rai ida-ne’e. Labele tuur nonook de’it. Ita-nia oan sira presiza duni profesór atu hanorin,” nia dehan.
Sekretáriu Estadu Ensinu Sekundáriu Jerál no Ensinu Téknika Vokasionál, Domingos Lemos Lopes, hateten ekipa edukasaun nian sei halo inspesaun ba eskola ne’ebé mak indikasaun atu taka.
“Ida dehan profesór menus hodi taka eskola ne’e, ita-nia kuadru pesoál ho ekipa ne’ebé mak sei tun ba territóriu tomak haree ona no laiha eskola ida mak menus profesór. Maibé, ami sei haruka tan inspetór atu haree eskola ida-ne’ebé mak iha indikasaun forte atu taka,” nia hateten.
Jornalista : Osória Marques
Editór : Cancio Ximenes
