Governu haloot ona mate-isin deskoñesidu rua iha semitériu Becuse
DILI, 23 janeiru 2024 (TATOLI)—Governu liuhosi Ministériu Solidariedade Sosiál no Inkluzaun (MSSI), tersa ne’e, haloot ona mate-isin deskonesidu (anju) rua ne’ebé soe iha tinan kotuk iha semitériu Becuse.
“Ohin, ita haloot ona anju rua ne’ebé soe iha tinan kotuk. Ohin, Polísia Ferensik entrega mai ita nune’e ohin ami haloot ona iha Becuse, ida-ne’e halo ona teste forensic,” Diretór Nasionál Asisténsia Sosiál (DNAS), Fernando dos Reis, hateten ba Agência Tatoli liuhosi telefónika.
Iha prosesu fúnebre ne’e, Ministra Solidariedade Sosiál no Inkluzaun interina partisipa prosesu haloot mate-isin deskoñesidu ne’e.
Matebian deskoñesidu na’in rua ne’e, ida mane tau naran Anju José, entretantu ida feto hanaran Anju Maria. Sira na’in rua hanaran Anju tanba sira moris mai fila-fali kedas ba aman-nia kadunan santu, tanba hahalok hosi ema laiha responsabilidade.
Tuir kronolojia, akontesimentu ne’e matebian deskoñesidu “Anju José” hafoin moris mai, ninia inan-aman lori ba rai hela iha área eskola sekundária 10 de Dezembru Comoro, entretantu matebian “Anju Maria” ninia inan-aman lori ba rai hela iha igreja laran Motael.
Jornalista : Osória Marques
Editór : Cancio Ximenes
