DILI, 25 janeiru 2024 (TATOLI) – Populasaun iha kapitál Dili seidauk sosa foos ho marka Golden Star hosi empreza Alfa Dili ne’ebé hetan subsídiu no asina kontratu ho Governu hodi halo intervensaun iha merkadu, tanba seidauk asesu iha kioske no loja sira iha kapitál.
Marina da Silva moradora iha Comoro hateten seidauk hetan foos ne’e fa’an iha merkadu ka kioske besik sira atu sosa.
“Rona duni kona-ba subsídiu ne’e, intervensaun foos ne’e, maibé ami seidauk hetan ema fa’an hodi ami bele sosa”, nia hateten ba Tatoli, iha Comoro.
Nia hateten, se koiske ka loja besik ami hela fatin fa’an ona foos ho marka ne’e, nia hakarak sosa ho presu ne’ebé adekuadu hodi bele konsome iha família.
Iha fatin seluk, Francisco Soares hanesan negosiante fa’an hahan tasak iha dalan-ninin iha Mascarenhas hateten, nia seidauk asesu foos iha kioske ka loja besik.
Francisco Soares hateten nia ba loja ka kioske sira besik sira-nia fatin, maibé seidauk hetan foos subsídiu hosi Governu ba empreza sira liuliu “Golden Star”.
Nia refere, uluk foos ‘Amor de Família’ konsege sosa saku ida, maibé ida foun ne’e seidauk sosa, tanba seidauk fa’an iha merkadu.
“Ami fokus ba haree foos ida de’it mak marka Folsom. Ha’u mos seidauk hatene kona-ba marka foun ho presu$11.50, maibé gosta sosa se fa’an hau hatene fa’an ona iha loja”, nia afirma ba Tatoli, iha Mascarenhas.
Entretantu, antes ne’e jerente Loja Alfa Dili, Paulo Sarmento informa katak foos importadu hosi nasaun Índia iha kuantidade 7.500 tonelada korresponde 300.000 saku hodi bele halo intervensaun iha merkadu atu responde ba populasaun nia nesesidade, tanba presu foos iha merkadu sa’e makaas.
Foos ho marka “Golden Star” fa’an ho presu $11.50 kada saku ho 25 KG ne’ebé loja Alfa Dili fa’an iha merkadu.
Relembra fali katak Governu liuhosi Ministériu Komérsiu no Indústria asina ho empreza sira hanesan Perissos fa’an ona foos ho marka ‘Amor de Família’ ho presu $10 kada 25 KG no ‘Beruang’ hosi loja Creative Furak ho presu $9 ba kada 20 KG ba populasaun iha merkadu rai-laran.
Jornalista: Jesuína Xavier
Editór: Rafael Ximenes de A. Belo
