DILI, 26 janeiru 2024 (TATOLI) – Ministru Justisa iha ezersísiu, Paulo Manuel Remédios, dehan Kaderneta Passaporte 73.000 sei uza ba tinan-rua de’it tanba kandidatu traballadór sira Korea, Austrália no nasaun sira seluk ezijente atu bele hetan Passaporte.
“Ita hatene ita-nia komunidade nian ezijénsia kona-ba Passporte ne’e bo’ot. Ita bo’ot sira hatene ita-nia kandidatu traballadór ne’ebé iha Korea barak mak hakarak iha Passaporte no ita-nia kandidatu traballadór Austraália barak no kuaze sira konkore vaga 50.000-resin mós prepara Passaporte. Tanba ne’e ha’u hanoin ita-nia Kaderneta Passaporte 73.000, ne’ebé Governu halo akizisaun iha Filandia ne’e seidauk to’o no presiza halo tán akizisaun”, Paulo Manuel Remédios, hateten ba jornalista sira iha nia kna’ar fatin Colmera, sesta ne’e.
Tanba ne’e, Paulo Manuel Remédio sei orienta tékinka Ministeriu Justisa nian atu halo levantamentu ba Passaporte ne’ebé agora daudaun ne’e iha ho objetivu atu ajuda Governu hodi deside atu halo akizisaun tán Kaderneta Passaporte atu bele nesesita ba tinan lima.
“Ha’u hanoin 10.000 Kaderneta Passaporte mós ita labele nesesita ita-nia populasaun iha tinan lima nian-laran, tanba demanda ita-nia populasaun ba Kaderneta Passaporte bo’ot, tanba Passaporte ne’e direitu ema-nian atu asesu ba Passaporte”, Paulo afirma.
“Ha’u seidauk iha estimasaun atu halo tán akizisaun Kaderneta Passaporte hira tán, tanba ne’e ha’u orienta ha’u nian tékniku sira halo tiha levantamentu ba Passaporte ne’ebé agora daudaun iha ne’e mak ita foin deside atu halo tán akizisaun hira tán ba Kaderneta Passaporte”, nia konklui.
Antes ne’e, Governu halo akizisaun ba Kaderneta Passaporte 73.000 liuhosi Empreza Thales. Produsaun ba Kadeerneta Passaporte prosesa iha Finlándia. Passaporte hirak ne’ebé transporta mai iha faze dahuluk hamutuk 16.000, faze daruak rihun 20-resin, datoluk rihun 15-resin no se mai tán.
Notísia relevante : Hein tan Kaderneta Passaporte rihun 57 tanba faze dahuluk hotu
Kaleidoskópia: MJ konsege rezolve problema kaderneta passaporte
Timor-Leste simu tán Passaporte rihun 15
Suspeita iha irregularidade emisaun Passaporte rihun 16 iha faze dahuluk
Passaporte 20.650 ‘’Chega’’ Dili sei atende ho online, munisípiu seidauk
MJ selebra kontratu ho Empreza Visimitra no Tales ba produsaun kaderneta passaporte
Jornalista: Natalino Costa
Editór : Zezito Silva
