EMSG sei haree timoroan poténsia eskola iha Malázia
DILI, 29 Janeiru 2024 (TATOLI)–Embaixadór Malázia iha Timor-Leste, Amarjit Sarjit Singh, anúnsia prezensa Servisu Global Edukasaun Malazia (EMGS) iha Timor-Leste hodi haree potensialidade hosi joven Timor-Leste sira-ne’ebé hakarak kontinua sira-nia estudu iha Malazia.
“Ha’u kontente ho Fundu Dezenvolvimentu Rekursu Umanu (FDCH) nia nakloke, ami hotu konkorda katak rekursu umanu importante tebes. Tanba ne’e, prezensa delegasaun ida-ne’e atu haree prosesu ne’e ba ami-nia aan rasik no ha’u haree potensialidade barak ba foinsa’e sira iha Timor-Leste. Ha’u hein katak iha futuru kolaborasaun ida-ne’e bele hadi’a kualidade rekursu umanu iha Timor-Leste,” Embaixadór Malázia iha Timor-Leste, Amarjit Sarjit Singh, hateten iha sorumutu ida-ne’ebé hala’o durante oras rua iha eskritóriu FDCH, segunda ne’e.
Xefe Ezekutivu EMGS, Novie Tajuddin, hateten Ministeriu Ensinu Superior Malázia sei koordena ho Siénsia Ensinu Superiór no Kultura Timor-Leste no mós FDCH atu lori estudante Timor-Leste sira ba estudu iha Malazia.
Tanba, nia dehan, EMGS nu’udar kompañia ida-ne’ebé iha objetivu hosi Ministeriu Ensinu Superiór Malazia nian no EMGS nu’udar órgaun responsável ba promosaun Malázia nu’udar sentru edukasaun internasionál.
“EMGS mós nu’udar órgaun prinsipál ba jestaun movimentu estudante internasionál sira-nian iha Malázia, inklui fasilita prosesu vistu. Edukasaun Malázia no EMGS oferese edukasaun di’ak-liu iha klase mundiál iha Malázia ba komunidade global,” nia hateten.
Diretór Ezekutivu FDCH, Julio Aparicio, apresia ho apoiu kolaborativu hosi EMGS no Governu Malázia ne’ebé bele suporta vizaun no misaun FDCH nian atu hadi’a kualidade rekursu umanu iha Timor-Leste.
“Liuhosi FDCH sira hakarak ajuda joven Timor-Leste sira-ne’ebé hakarak kontinua sira-nia estudu iha rai-li’ur, atu nune’e iha tinan tolu to’o tinan lima sira bele kontribui ba nasaun ne’e. Sira hakarak hatene saida mak FDCH halo ona to’o agora ba dezenvolvimentu rekursu umanu,” nia hateten.
Antes ne’e, EMGS mós hala’o eventu edukasaun ida-ne’ebé partisipa hosi universidade hitu (7) hanesan Universidade Azia Pasifiku (APU), Universidade Jestaun & Siensia (MSU), Universidade Raffles, Universidade Taylor, Universidade Kebangsaan Malázia (UKM), Universidade Malázia Sabah no Universidade Tunku Abdul Rahman (UTAR).
Alumni estudante Timor-Leste, Saturlino Saldanha, hateten EMGS mak Sentru One-Stop Malazia nian ba estudante internasionál sira-ne’ebé kontinua sira-nia ensinu superiór iha Malázia. Malazia iha programa edukasaun ne’ebé avansadu tebes entre nasaun sira iha Azia.
“Kustu edukasaun nian ne’ebé di’ak tebes ba estudante sira no Malázia mós iha kontrolu ne’ebé di’ak tebes no la husik sira-nia estudante sira gasta tempu atu hemu tua, droga, no seluk tan,” nia dehan.
Jornalista : Osória Marques
Editór : Cancio Ximenes
