DILI, 29 janeiru 2024 (TATOLI) – Komunidade Postu Administrativu Luro, Munisipiu Lautem husu Governu fasilita trator hodi hasa’e produsaun agríkola, liuliu hare hodi asegura seguransa ai-han iha nível lokal.
Preokupasaun ne’e hato’o husi Xefi Suku Afabubu, Fernando Lopes bainhira marka prezensa iha diálogue no sensibilizasaun programa dezenvolvimentu rural hala’o husi Ministériu Dezenvolvimentu Rural no Abitasaun Komunitariu (MDRAK), iha Postu Admintrativu Luro, Munisipiu Lautem, sesta seman kotuk (26/01).
“Maioria povu Postu Administrativu Luro moris ho agrikultura, liuliu halo natar no toos. Maibe, ami nia problema mak laiha trator no irigasaun hodi fasilita ami hasa’e produsaun agríkola. Entaun, aproveita oportunidade ida ne’e, ami husu ba governu atu fasilita ami trator hodi halo natar no toos,” Xefe Suku Fernando esplika.
Nia argumenta katak Luro iha potensia ba produsaun hare, maibe iha rai produtivu barak mak sei abandona: “Laiha trator no irigasaun, ita labele halo buat ida. Ne’ebé ita persiza trator no irigasaun atu hasa’e produsaun agríkola hodi hamenus ita nia dependensia ba produtu rai liur.”
Hatan ba preokupasaun ne’e, Vise Primeiru Ministru, Ministru Koordenadór Asuntus Sosiais no Ministru Dezenvolvimentu Rurál no Abitasaun Komunitária, Mariano Assanami Sabino hateten kestaun irigasaun sei enkaixa iha program dezenvolvimentu rural: “Ekipa sei halo estudu viabilidade ida hodi hare oinsa halo irigasaun ne,ebé kualidade para bele uja ba tempu naruk.”
“Imi nia difikuldade sira ne,e ami anota no iha tempu badak ekipa sei tun halo verifikasaun ba natar sira hodi hala’o estudu viabilidade,” Assanami dehan.
Enkuantu, hatan ba preokupasaun trator, Sekretáriu Estadu Florestas, Fernandinho Vieira promote sei koalia ho Ministériu Agrikultura, Pekuária, Peska no Florestas (MAPPF) hodi hare ba kestaun ne’e.
Nia salienta katak MAPPF sei distribui trator ida ba Postu Administrativu Luro hodi ajuda komunidade sira halo toos no natar.
“Hau promote iha fulan oin MAPPF sei lori traktor ida mai hodi fasilita komunidade halo natar no toos,’’ Fernandinho konklui.
Jornalista: Camilio de Sousa
Editor: Filomeno Martins
