Don Virgílio Kardeál fó pose ba dirijente UCT

DILI, 30 janeiru 2024 (TATOLI)—Arsebispu Arkidioseze Metropolitan Dili, Don Virgílio Kardeál da Silva do Carmo, SDB, hamutuk ho ho Reitór Universidade Católica de Timor-Leste (UCT) São João Paulo II, Pe. Joel Casimiro Pinto, fó pose ba dirijente foun UCT, hodi serbí ho seriedade nakonu ho dedikasaun.

Notísia Relevante: UCT hala’o abertura prosesu aprendizajen tinan akadémiku 2022

“Ohin. UCT renova uituan estrutura hahú hosi uluk iha pro-reitór sira-ne’e no foti sa’e fali ba vise reitór no reitór mós pose ba koordenadór kursu no ba dosente foun sira-ne’ebé mak kontratu atu servisu iha universidade ida-ne’e. Ami halo ida-ne’e hanesan toman ida UCT atu hotu-hotu servisu hamutuk, no ida-ne’e hanesan kompromisu no onra, nune’e ezije sira-nia seriedade, dedikasaun, fó aan hodi serbí tuir kontratu ne’ebé mak sira asina,” Don Virgílio Kardeál do Carmo da Silva, hateten hafoin fó pose ba dirijente UCT iha salaun UCT, Balide, tersa ne’e.

Ohin mós, Don Virgílio Kardeál hateten, sai hanesan tinan ida-ne’ebé UCT ninia prosesu ba akreditasaun institusionál, hodi halo preparativu sira-ne’e atu hakat ba prosesu tinan ne’e nian.

Diferensa no mudansa UCT hosi universidade seluk, Don Virgílio hatán, loos duni iha UCT medisina mós iha hanesan ho Universidade Nasionál Timor-Leste (UNTL) maibé universidade rua ne’e iha diferensa entre sistema ne’ebé mak adota, tanba iha UNTL adota sistema Cuba nian no UCT adota tuir nasaun rejionál nian.

“Liafuan badak mak UNTL adota Cuba no halai liubá preventiva nian no UCT aposta liubá kurativa, ida-ne’e mak diferensa. Sira-ne’ebé mak ramata estudu iha-ne’e ,sei kontinua ba rai-li’ur tanba iha referénisa ne’ebé UCT iha,” nia dehan.

Reitór Universidade Católica de Timor-Leste (UCT) São João Paulo II, Pe. Joel Casimiro Pinto, hateten ohin UCT manifesta ninia prosesu tomak atu hasa’e kualidade ne’ebé signifika katak hahú avansa ka progeresu UCT la’ós reitór mesak maibé ema hotu nia koopersaun no kolaborasaun entre parte hotu hodi bele atinje mehi ema hotu nian.

“Tanba ne’e, mai ita servisu hamutuk tanba susesu ne’e la’os ema ida de’it, maibé servisu ekipa mak bele hetan susesu no hamutuk forte mak bele la’o ba oin,” nia hateten.

Padre hatutan katak tinan tolu nia laran, UCT menus rekurus umanu maibé ba ohin simu pose ne’e aumenta barak, no ida-ne’e iha progresu no hadi’ak liután UCT ne’e.

“Ida-ne’e tanba apoiu ho arkidioseze nian mak infraestrutura UCT nian aumenta no iha prosesu konstrusaun foun ba fatin estudu nian. La’ós de’it aumenta rekursu umanu maibé mós presiza infraestrutura ne’ebé kualidade no edekuadu,” nia dehan.

UCT mós simu ema ho defisiénsia hodi asesu ba edukasaun inkluzivu maibé sira-nia pursentu sei kiik. UCT akolla ema hotu la haree ba ema-nia fíziku, tanba ne’e mak iha oin infraestrutura ba ema ho defisiénsia mós instala hodi ema bele asesu tama mai.

Iha UCT Fakuldade haat mak Siénsia, Edukasuan, Arte no Kultura, Siénsia Umana, Siénsia Saúde, Enjiñaria Téknika Agrikola ne’ebé kompostu hosi kursu 22 maibé iha kursu balun ema ladún asesu no iha kursu balun em asesu barak. Katak, sira-ne’ebé mai estuda barak liu ba medisina, erfermajen no farmásia, iha fakuldade siénia umana nian mak kursu direitu.

Notísia Relevante: PM Taur espera UCT sai ensinu superiór exelente iha Timor-Leste

Jornalista : Osória Marques

Editór         : Cancio Ximenes