DILI, 01 fevereiru 2024 (TATOLI)—Eletricidade de Timor-Leste, Empreza Públika (EDTL, E.P) la autoriza empreza harii estaleiru iha postu administra Laleia, munisípiu Manatuto ho razaun tau prioridade ba solár-PV.
“Tempu hirak ekipa sira mai duni hasoru ami hodi ko’alia kona-ba rai iha Laleia, maibé ita tenke hatene katak rai ne’e Sekretaria Estadu Terra no Propriedade atribui ona ba EDTL tanba atu halo solár-PV,” Komisáriu Ezekutivu Servisu Korporativu EDTL, E.P, Júlio de Jesus Gonçaves, hateten ba Agência Tatoli, iha ninia knaar fatin, Caicoli, kinta ne’e.
Komisáriu konsidera katak solár-PV nu’udar investimentu importante ba Estadu tanba bele ajuda Governu redús kustu kombustível, ne’ebé projetu ne’e tempu badak sei implementa iha área identifikadu iha Laleia.
Notísia relevante : TradeInvest no empreza Tsuneishi Shipbulding identifika rai iha Laleia harii estaleiru
Iha dezembru 2023, Ajénsia Promosaun Investimentu no Esportasaun, Institutu Públiku (TradeInvest Timor-Leste) fasilita empreza Tsuneishi Shipbuilding C. Ltd hosi Japaun hodi halo verifikasaun ba utilizasaun rai Estadu ne’ebé lokaliza iha postu administrativu Laleia.
Ekipa hosi vizita konjunta ne’e kompostu hosi TradeInvest Timor-Leste, EDTL, E.P no Terra no Propriedade munisípiu Manatuto, ne’ebé akompaña hosi ekipa Asian Development Bank (ADB) hodi konfirma kona-ba utilizasaun rai Estadu entre projetu Enerjia Renovável ho indústria estaleiru hosi Empreza Tsuneishi Shipbuilding C. Ltd.
Antes ne’e, Primeiru-Ministru, Kay Rala Xanana Gusmão bainhira halo vizita bá Japaun, hala’o mós vizita ba eskritóriu empreza Tsuneishi Shipbuilding C. Ltd, ne’ebé lokaliza iha área Hiroshima Tókiu, Japaun.
Tuir estimasaun bainhira investimentu ne’e harii, sei oferese postu traballu mínimu 4.000 ba timor-oan, prodús ró (vessel) hamutuk 10-12 kada tinan inklui sei harii eskola, ótel no ospitál.
Jornalista : Antónia Gusmão
Editora : Julia Chatarina
