Autoridade estende kontratu empreza hodi fornese kombustível ba sentrál elétrika Sakato
OÉ-CUSSE 03 fevereiru 2024 (TATOLI)—Autoridade Rejiaun Administrativa Espesiál Oé-cusse Ambeno (RAEOA) estende tan kontratu empreza Pertamina ba fulan-rua, hodi kontinua fornese kombustível ba sentrál elétrika Sakato.
Prezidente Autoridade RAEOA, Rogério Tiago Lobato, informa, Autoridade daudaun ne’e foin hala’o nia serbisu loron-rua iha Oé-cusse, ne’ebé seidauk bele halo serbisu barak tanba sei foku ba organizasaun administrasaun.
“Antes ha’u mai Autoridade Sesante dehan katak mina ba sentrál elétrika atu hotu ona, maibé ne’e hanesan bomba relójiu ida ba administrasaun foun, dehan mina laiha ahi mate, ema hotu komesa protesta, maibé iha oras 24 nia laran, ha’u rezolve daudaun mina ne’e, mina komesa tama ona, ne’ebé eletrisidade sei la mate,” Rogério Lobato, hateten, iha Gabinete ZEESM Oé-cusse, sabadu ne’e.
Notísia relevante: Kombustível bá sentrál
elétrika Sakato sei hotu iha fevereiru
Nia dehan, tuir loloos empreza ninia kontratu ho RAEOA termina iha loron 29 fevereiru 2024 ne’e, maibé Autoridade deside estende tan ba fulan-rua hodi loke fali konkursu foun.
“Para ema ne’ebé aprezenta proposta di’ak liu ba Oé-cusse, ida-ne’e maka ami sei hili, la’ós mai iha ne’e hili tanba kompadre, ne’e sei laiha, ida-ne’e tenke haree tanba osan ba Oé-cusse ne’e tenke gasta didi’ak,” nia akresenta.
PA defende, bainhira Autoridade prosesa ba konkursu públiku sei haree liu ba kustu la’ós familiarizmu, nune’e bele garante kualidade fornesimentu.
“Sei mina ida folin karun liu balun baratu, ha’u tenke sosa mak baratu ne’e, importante maka tenke garante nia kualidade no fornesimentu ne’e, katak labele to’o tempu fornese, tenke fornese, tanba ne’e mina ba ahi sei la mate, tanba horisehik kedan mina komesa tama ona iha sentrál elétrika,” nia relata.
Autoridade daudaun ne’e sei konsentra organiza administrasaun, Sekretáriu Rejionál ida-idak ninia fatin no serbisu, hadoin ida-ne’e maka Prezidente Autoridade sei hala’o vizita ofisiál ba komunidade sira iha sub-rejiaun sira hotu hosi Oésilo, Pássabe to’o Nítibe.
“Ita hakarak dezenvolvimentu labele iha de’it Pante Makasar, maibé tenke dada to’o sub-rejiaun sira no suku hotu, tanba eletrisidade kobre hotu ona, entaun dezenvolvimentu tenke to’o ne’ebá,” nia tenik.
Entretantu, iha loron 22 janeiru 2024, Ministru Obra Públika, Samuel Marçal, orienta ekipa téknika Eletricidade de Timor-Leste, Empreza Públika (EDTL, E.P) lideradu hosi Prezidente Konsellu Administrasaun EDTL, E.P, Paulo da Silva, hosi observa direita nesesidade kombustível iha sentrál elétrika Inur Sakato.
Durante prezenta EDTL, E.P iha sentrál ne’e, deteta katak persiza duni intervensaun hosi Autoridade foun tanba kombustível hahú menus no persiza konkursu públiku tanba empreza atu ramata ona nia kontratu.
Jornalista : Abílio Elo Nini
Editora : Julia Chatarina
