iklan

INTERNASIONÁL, DESPORTU, DILI, HEADLINE

Marsu, Atleta na’in-rua bá Xina hodi partisipa World Taekwondo Championships

Marsu, Atleta na’in-rua bá Xina hodi partisipa World Taekwondo Championships

Membru Federasaun Taekwondo Timor-Leste (FTTL) hatudu demostrasaun iha ambitu festival futuru joventude hahu hosi ita, iha Portu Dili, sesta (14/04). Imajen Tatoli/Francisco Sony

DILI, 05 fevereiru 2024 (TATOLI)– Prezidente Federasaun Taekwondo Timor-Leste (FTTL), Gabriel da Costa, informa iha fulan-marsu atleta na’in-rua bá nasaun Xina hodi partisipa kompetisaun World Taekwondo Championships, ne’ebé organiza hosi Asian Taekwondo Union.

“Marsu 17-18, ita haruka atleta na’in-rua bá Xina hodi kompete iha World Taekwondo Championships, jogu ne’e hanesan faze kualifikasaun, bainhira ita nia atleta hatudu prestasaun di’ak mak bele kontinua bá kompete iha jogu Olímpiku ne’ebé sei hala’o iha Fransa (Paris) iha jullu tinan ne’e,” hatete Prezidente ne’e ba Agência TATOLI, I.P iha Jináziu Dili, segunda ne’e.

Loloos, nia dehan atleta na’in ida mak ba tuir kompetisaun ne’e, maibé FTTL haree no analiza situasaun hotu no foti desizaun hodi hili tan atleta na’in ida, nune’e hamutuk na’in-rua.

“Atleta ne’ebé fiksu ona mak Ana da Costa ne’ebé sei joga iha kilograma 46, atleta ida fali ami sei deside iha tempu besik ne’ebé ita seidauk hatene nia mak sé, tanba atleta barak ita sei halo lai selesaun,” nia afirma.

Daudaun ne’e, Atleta Ana da Costa halo hela preparativu másimu iha Dili no iha sentru treinamentu Tibar.

Notísia relevante:Maiu, Federasaun Taekwondo Timor-Leste realiza kampionatu nasionál

Jornalista: Hortencio Sanchez

Editór      : Florencio Miranda Ximenes

iklan
iklan

Leave a Reply

iklan
error: Content is protected !!