iklan

DESPORTU, BOBONARO, HEADLINE, MUNISÍPIU

CDTL-AMB diskute preparasaun atu partisipa Fronteira Cup iha Atambua

CDTL-AMB diskute preparasaun atu partisipa Fronteira Cup iha Atambua

Prezidente CDTL Munisípiu Bobonaro, Mário Soares. Imajen Tatoli/Sérgio da Cruz.

BOBOBARO, 09 fevereiru 2024 (TATOLI) – Prezidente Konfederasaun Desportu Timor-Leste (CDTL, sigla portugés) munisípiu Bobonaro, Mario Soares, sesta ne’e halo enkontru koordenasaun ho Prezidente Autoridade Munisípiu (PAM) Bobonaro, Ernesto de Oliveira Barreto, hodi diskute preparasaun atu partisipa eventu Fronteira Cup époka 2024 ne’ebé tuir planu sei realiza iha Atambua, munisípiu Belu, provínsia Timor Osidentál (NTT, sigla indonézia), Repúblika Indonézia.

Prezidente CDTL Munisípiu Bobonaro, Mário Soares, esplika eventu ne’e tuir loloos atu realiza iha tinan 2019, maibé la konsege tanba surtu Covid-19 no foin lalais ne’e mak foin hetan autorizasaun hosi Ministru Juventude, Desportu, Arte no Kultura, Nélio Isaac Sarmento katak tenke reativa fali eventu ne’e iha fulan-jullu 2024.

Notísia Relevante:CDTL Bobonaro aprezenta pontu tolu ba PAM

“Ohin, ha’u mai hasoru prezidente autoridade munisipál ho nia sekretáriu asuntu sosiál, ami ko’alia kona-bá oinsá atu prepara kondisaun ba atleta sira-ne’ebé mak ita atu lori ba kompete, entaun primeiru fatin, tanba atleta sira-ne’ebé ita atu lori ba ne’e la foti hosi fatin seluk, tenke ema Bobonaro oan-bazea ba resensiamentu eleitorál,” nia ko’alia iha edifísiu administrasaun Bobonaro.

Mário esplika, enkontru ne’e ba faze dala-haat nian no ohin konsege hetan rezultadu pozitivu tanba Prezidente Autoridade Munisipál Bobonaro mós pronta apoia eventu ne’e.

“Ha’u fiar katak ha’u-nia proposta ohin aprezenta ne’e sei hetan aseitasaun, depois tempu badak ami sei halo selesaun ba atleta sira iha postu neen, sira-ne’ebé mak tama kritéria ami sei foti, hodi mai konsentra iha munisípiu, atu ami halo oráriu treinu no entrega ba tékniku sira hodi halo ezersísiu,” nia katak.

Enkuantu atleta ne’ebé sei partisipa iha eventu ne’e mai hosi modalidade lima hanesan; futeból, voleiból, basketeból, atletizmu, kurrida bisikleta no maratona rute hosi Atambua mai to’o Timor-Leste.

Tuir ajenda, loron-sábadu (10/02) CDTL sei konvoka enkontru ho Prezidente Asosiasaun 11 ne’ebé eziste iha munisípiu Bobonaro hodi ko’alia kona-bá preparasaun ba eventu ne’e.

Notísia relevante: CDTL prioriza dezenvolvimentu desportiva iha Timor-Leste

Jornalista: Sérgio da Cruz

Editór: Evaristo Soares Martins

iklan
iklan

Leave a Reply

iklan
error: Content is protected !!