iklan

EDUKASAUN

ME husu profesór kontradau fó tempu ba Governu rezolve fazeadamente

ME husu profesór kontradau fó tempu ba Governu rezolve fazeadamente

Profesores kontratadu sira bainhira halo long mars husi CCD ba too iha jardim BJ Habibie hodi protesta dezisaun ministeriu eduksaun neebe hapara sira nia kontratu, segunda 22 janeiru 2024.Foto Tatoli/Antonio Daciparu

DILI, 12 fevereiru 2024 (TATOLI)—Portavós Gabinete Ministériu Edukasaun, Filipe Rodrigues Pereira, husu ba profesór kontratadu sira fó tempu ba Ministériu Edukasaun (ME) atu rezolve sira-nia problema fazeadamente tanba prosesu hirak-ne’e ligadu mós ho esklaun profesór sira-nian.

Notísia Relevante: PN apresia ME rezolve profesór kontratadu 4000-resin ba permanente

“Ligadu ho manifestasaun hosi ita-nia profesór kontratadu 2023 halo iha portaun Ministériu Edukasaun ne’e, ha’u hanoin signifikativu no nu’udar sidadaun iha direitu ba protest. Kona-ba asaun ne’ebé ita-nia Polísia Nasionál Timor-Leste (PNTL) ne’e mós obrigatóriu, parte seguransa nian hodi foti medida. Asosiasaun Manorin Na’in Timor-Leste (AMN-TL), nia ezijensia mós ami haree ona, nune’e husu atu fó tempu ba ministériu atu prosesa fazeadamente tanba ligadu ho esklaun profesór nian,” Portavós ne’ e hateten liuhosi konferénsia imprensa iha sala ME, Vila Verde, segunda ne’e.

Tuir nia, pagamentu ba profesór kontratadu hirak ne’ e presiza mós orsamentu no kada tinan sempre lori ba Konsellu Ministru hosi hetan aprovasaun, tanba ne’e husu ba profesór kontratadu sira tenke kompreende situasaun.

“Ita la’ós la halo maibé sei halo ho neineik no fazeadament. Ami espera katak iha tinan lima nia-laran bele responde profesór sira-nia ezijensia sira. La hotu maibé sira bele simu sira-nia direitu hosi Governu. No ita mós ezije katak profesór sira hala’o obrigatóriu ne’ebé ho di’ak iha future,” nia dehan.

Mezmu Governu liuhosi Ministériu saúde loke ona bolsa rekrutamentu ba profesór nian, maibé tanbasá mak Ministériu Edukasaun labele halo diálogu ho profesór sira halo demonstrasaun refere.

“Ha’u hanoin profesór kontratadu ho Ministériu Edukasaun interpreta artigu 11 la hanesan. Tanba ne’e mak ha’u hakarak hateten ba ita-boot sira, iha IX Governu Konstituisional ho nia Sekretáriu Estadu bainihira mai Kiko atu oinsá lori profesór kontratadu sira, lori ba ingresu espesiál bazea ba dekretu lei númeru 31/2023, ezijensia legál ne’ebé Ministériu koko atu halo,” nia dehan.

Nune’e, nia dehan, iha setembru-outubru 2-23, ME koordena ho Komisaun Funsaun Públika, haree planu oinsá lori profesór kontratadu ba ingresu espesiál tuir artigu 11, dekretu lei númeru 31/2023. Iha tempu ne’ebá profesór mai ho númeru 600.000 entaun númeru boot nune’e tenke halo koordenasaun ho KFP.

“Agora problema boot ne’ebé ita-nia profesór enfrenta mak avaliasaun dezempenu ne’ebé rejistadu iha SIGAP no tuir artigu 11 katak halo avaliasaun dezempenu ne’e ba profesór 2021 ho 2022. Tanba Ministériu Edukasaun lori de’it 4.600-resin ba ingresu espesiál. Agora maluk sira-ne’ebé halo protestu ne’e tinan 2021 ho 2022 nian. No ami dekretu lei númeru 31/2023 la fó dalan no mós lei KFP,” esplika.

Nia hateten, atu halo diálogu mak sira mai hasoru Ministra Edukasaun, Sekretáriu Estadu ho ami mós laiha solusaun tanba la konkorda malu entaun laiha solusaun ba kestaun ne’e.

“Ministra mós kontinua akompañia protestu ne’e no ami mós rona katak manifestaun iha Tasi-Tolu no ohin dadeer iha edifísiu edukasaun nin katak laliha solusaun ka resposta mak sei lori ba tribunál. Ida-ne’e, ha’u hanoin dalan di’ak-liu, depois mak parte edukasaun ba hatán. Ministériu Edukasaun sei la halo prosesu ligadu ho ingresu espesiál ne’e. Tanba, ita tau sees tiha lei no halai ba leten ne’e, laiha,” nia dehan.

Portavós ne’e hateten katak ME lakohi foti risku no sei la’o tuir de’it profesór kontratadu sira bainhira submete ba tribunál.

Entretantu porta-voz Profesór kontratadu, Agustinho Pinto, hateten profesór sira sei lori karta ba Ministériu Públiku (MP) no ba Provedór Direitu Umanu no Justisa (PDHJ, sigla portugés), nune’e loke investigasaun kle’an ba autoridade seguransa ne’ebé halo kapturasaun no agresaun fíziku hasoru profesór iha Ministériu Edukasaun.

Autoridade seguransa nia papel mak asegura estabilidade ba povu kbi’it laek sira, la’ós asegura fali elit polítika sira, tanba PNTL nia servisu atu asegura lei no orden, ne’ebé tau iha sira-nia kbaas hodi asegura ema-ne’ebé kbiit laek hodi buka lia-loos no justisa la’ós asegura fali elit polítika.

“Ami sei kondena no lori karta ba Ministériu Públika no Provedór Direitu Umanu no Justisa atu investiga autoridade seguransa ne’ebé ohin dadeersan halo agresaun fíziku ba ami-nia maluk profesór sira. Ami ezije ami-nia direitu, tanba sira agresaun fíziku,” nia dehan iha konferénsia imprensa, jardin 5 de Maio, Colmera.

Tuir-nia, atividade ne’ebé profesór sira halo ne’e kontinuasaun hosi manifestassun ne’ebe mak sira halo iha fulan-jullu 2023.

“Konstituisaun RDTL, hatudu iha Artigu 42, ko’alia kona ba manifestasaun nian. Tanba ne’e, ami sei nafatin ezije ba Ministeriu Edukasaun atu rezolve ami-nia problema, no ami nia estatutu ba ingressu espesiál hodi signifika no valoriza ami hotu nia sakrifísiu ne’ebé ami hala’o tiha ona ho volontáriu tinan 10-resin”.

Jornalista : Osória Marques

Editór       : Cancio Ximenes

iklan
iklan

Leave a Reply

iklan
error: Content is protected !!