AMB husu EJS ho líder komunitária kontrola projetu PNDS
BOBONARO, 16 fevereiru 2024 (TATOLI) – Prezidente Autoridade Munisípiu Bobonaro, Ernesto de Oliveira Barreto, husu ba Ekipa Jestaun Suku (ESJ) atu servisu hamutuk ho líder komunitária sira hodi kontrola projetu ne’ebé implementa hosi Programa Nasionál Dezenvolvimentu Suku (PNDS) 2024 bele la’o ho susesu tuir tempu ne’ebé iha.
Ernesto de Oliveira Barreto, hato’o kestaun ne’e iha enkontru nível munisipál entre Programa Nasionál Dezenvolvimentu Suku (PNDS), ho ekipa fasilitadór postu, Ekipa Jestaun Suku no Kandidatu Fonrnesedór sira iha Jináziu Maliana, sesta ne’e.
Tuir nia, projetu PNDS ne’e atu la’o ho loloos ne’e reponsablidade EJS, tanba ne’e molok implementa projetu tenke halo uluk koordenasaun servisu ho autoridade lokál sira nune’e bele tau matan lisuk ba projetu ne’ebé implementa.
“Ekipa EJS ho xefe suku sira tenke sólidu, tanba ita-nia orsamentu tinan ne’e ho tinan oin mak sei determina munisípiu Bobonaro avansa ba podér lokál iha 2027, sé karik iha fatin balun implementasaun la’o laloos, la hotu hanesan 2021 nia to’o agora la hotu, ita sei la hakat ba podér lokál,” nia dehan.
Nia husu ba tékniku PNDS koordena ho parte hotu atu bele servisu maka’as hodi garante pojetu foun finaliza duni iha tinan 2024 tanba projetu tinan 2021 no 2022 iha suku balu to’o agora seidauk finaliza.
Tuir nia, daudaun ne’e ekipa sira halo hela auditoria iha munisípiu balu ba projetu PNDS ne’ebé abandona no seidauk konklui.
“Hare buat sira-ne’e la la’o karik, fó informasaun imediata ba diretór PNDS atu nune’e diretór bele koordena ho Prezidente Autoridade oinsá ita atu haree prosesu ne’e, ita labele nonok de’it, tanba ami ba reiniaun iha nasionál ita-nia Primeiru-Ministru dehan projetu PNDS 2021 la sala osan sei iha hela millaun $30-resin mak sei iha,” nia dehan.
Diretór PNDS munisípiu Bobonaro, Rosário Mali, husu fornesedór sira atu intede didi’ak matadalan PNDS tanba iha rekizitu sistema aprovizionamentu balu foun.
“Ita kria enkontru hanesan ne’e, nune’e bele esplika fali buat-ne’ebé mudansa, karik ita-boot sira seidauk intende, atu nune’e ba oin, karik ita-boot sira sai hanesan fornesedór bele intende ho di’ak, nune’e fornese sasán tuir nia matadalan,” nia dehan.
Notísia relevante: PNDS Bobonaro koloka ona pesoál tékniku monitoriza projetu UNP
Jornalista: Sérgio da Cruz
Editór: Evaristo Soares Martins
