VIQUEQUE, 21 fevereiru 2024 (TATOLI)- Diretór Diresaun Nasionál Transporte Terrestre (DNTT) munisípiu Viqueque, Saul Henrique, informa, janeiru tinan ne’e konsege rekolla reseita liuhusi inspesaun dokumentu transporte hamutuk $10,047.50 ba kofre Estadu.
“ami konsege rekolla reseita husi inspesaun dokumentu, troka naran no karta kondusaun liuliu ba transporte sira iha munisípiu Viqueque ho totál hamutuk $10,047.50 maka ami hatama ba kofre Estadu”, Diretór ne’e relata ba Agênsia Tatoli, I.P, iha ninia kna’ar fatin, Beloi, ohin.
Reseita ne’ebé maka DNTT Viqueque rekolla liuhosi inspesaun totál invoice hamutuk 473 ho totál reseita hamutuk $6,605.00, lisensa tranjitu invoice hamutuk 19 nia reseita $545.00, troka naran invoice 105 nia reseita $1,117.50 no karta kondusaun invoice 95 ho reseita $1,780.00.
Alende ne’e, Diretór ne’e afirma tan katak to’o oras-ne’e motorista barak mak seidauk foti sira-nia dokumentu hanesan inspesaun ba motorizada no karreta nian purvolta 200-resin no karta kondusaun 50 tinan 2022 ne’ebé maka daudaun ne’e sei kontinua rai iha edifísiu DNTT.
Iha tinan 2023, DNTT munisípiu Viqueque konsege trata dokumentu ba karta kondusaun hamutuk 394, motorista sira-ne’ebé prepara atu ba tuir teste prátika karta kondusaun nian na’in 274 no motorista sira-ne’ebé seidauk selu invoice no seidauk teste eskrita no prátika na’in 36.
“Dezafiu ne’ebé durante ne’e DNTT munisípiu Viqueque enfreta maka edífisu tanba daudaun uza provizóriu edifísiu servisu Obra Públiku munisípiu Viqueque, maske DNTT mós rekolla reseita ba kofre Estadu, maibé to’o agora edifísiu seidauk iha,”nia lamenta.
Daudaun ne’e, funsionáriu DNTT munisípiu Viqueque na’in-10 maka fó atendementu ba klínte sira-ne’ebé trata sira dokumentu ba transporte.
Jornalista : Vitorino Lopes da Costa
Editór : Florencio Miranda Ximenes
