iklan

JUSTISA, HEADLINE

Kazu Likintae, Tribunál aplika medida koasaun AP ba arguidu LS

Kazu Likintae, Tribunál aplika medida koasaun AP ba arguidu LS

Kazu Likintae

DILI, 21 fevereiru 2024 (TATOLI)-Tribunál Judisiál Primeira Instánsia Dili deside iha kuarta feira (21/2), aplika medida koasaunAprezentasaun Periodika (AP) ba arguidu oknum polísia LS ne’ebé insidentalmente, tiru membru F-FDTL Komponente Navál Korpu Fujileiru, Abrão Smith iha área Likintae, Suku Lahane Orientál, Postu administrativu Na’in Feto, Munisípiu Dili, domingu, foin lalais ne’e.

Kazu oknum PNTL AM tiru vítima Abrão Smith akontese iha área Likintai iha domingu (18/2) tuku 3:00 madrugada oknum PNTL ho arma deskonfia tiru kanek vítima Abrão Smith.

Iha prosesu interrogatóriu dahuluk, Ministeriu Públiku Domigos Barreito, promove arguidu ho krimi tentativa omesídiu ne’ebé previztu iha artigu 145, 138 no konjuga mós ho artigu 23 no 24 hosi Kóndigu  Penál Timor-Leste.

Durante interrogatóriu dahuluk MP husu Tribunál liuhosi Juíz Titulár ba kazu ne’e, Juíz José Maria de Araújo atu aplika medida koasaun  prizaun preventiva, maibé  hafoin Tribunál rona tiha fundamentu hosi Ministériu Públiku nian, Tribunál entende katak arguidu nia aktus  ne’e a la priense ba iha medida koasaun ba Prizaun Preventiva.

Tanba momentu arguidu halo aktus ida ne’e la’ós ho intensaun hodi tiru direta ba vítima maibé nia tiru pistola ba iha estrada mak bala musan kona vítima.

Notísia relevante:Insidente tiru iha Likintae nu’udar aktu diskuídu

Tanba ne’e, Tribunál aplika medida koasaun Aprezentasaun Périodika ba iha arguidu LS hodi aprezenta aan ba polísia semana rua dala ida.

Hafoin desizaun Tribunál, Defeza hosi arguidu LS, Advogadu Privadu Cancio Freitas, hateten, hanesan Defeza nia simu medida koasaun Aprezensaun Périodika ne’ebé Tribunál aplika ba nia kliente.

“Desizaun ida ne’e defeza haree adekuadu tuir duni prosesu ne’ebé maka akontese,” Cancio Freitas hateten ba jornlista sira iha TJPID, Colmera-Dili, kuarta ne’e.

Nia dehan, medida ida ne’e nu’udar medida koasaun ida ne’ebé mak Tribunál halo hodi asegura arguidu kontinua ba prosesu investigasaun ba oin, tanba kazu ne’e seidauk ramata, Ministériu Públiku husu Tribunál atu hakle’an posesu investigasaun kazu liuliu sei halo ezaminasaun balístiku ba bala musan.

Entretantu, kazu tiru Likintae ne’e sei kontinua tanba bazea ba prosesu investigasaun ne’ebé maka halo ba arguídu, Ministériu Públiku haree arguidu LS momentu ne’e tiru ba estrada.

Tanba ne’e atu hatene liután prosesu ba kazu ne’e, MP sei hakle’an investigasaun ba kazu ne’e.

Enkuantu, oknum polísia ho insiál LS ne’e Komandu Jerál PNTL deside dezarma ona membru polísia ne’e hodi kontinua ba prosesu investigasaun.

Notísia relevante:PNTL no F-FDTL halo investigasaun konjunta ba kazu Likintae

Jornalista: Natalino Costa

Editór: Rafael Ximenes de A. Belo

 

iklan
iklan

Leave a Reply

iklan
error: Content is protected !!