DILI, 22 fevereiru 2024 (TATOLI)-Ministériu Edukasaun oras ne’e daudaun sosa ona karteira hamutuk rihun sia-resin ho orsamentu jerál Estadu 2024 ho valór millaun $ 1.5 hodi distribui ba eskola sira ne’ebé maka to’o oras ne’e sei falta kadeira ho meza atu nune’e bele fasilita prosesu aprendizajén ba estudante sira.
Diretór Nasionál Infraestrutura no Edukativa, Ministériu Edukasaun (ME), Hélio Lopes, informa karteira hirak ne’e, sei distribui ba eskola sira iha territóriu Timor-Leste, tanba daudaun ne’e rai ona iha edifísiu Ministériu Edukasaun Villa-Verde Dili.
Notísia Relevante :Estudante Boboloa Oé-Cusse tuur de’it iha rai tuir ensinu no aprendizajen
“Ba tinan ida-ne’e ita tau miliaun $1.5 hodi sosa kadeira ho meza rihun 9-resin. Tanba tuir ami-nia lista eskola ne’ebé sei presiza ne’e 200-resin,” nia hateten ba TATOLI, iha Salaun Delta Nova, kinta ne’e.
Antes ne’e, nia dehan, Ministériu Edukasaun halo ona distribuisaun karteira hamutuk rihun 20 ba iha territóriu TL, maibé seidauk to’o tanba eskola barak maka sei falta kadeira no meza.
Nune’e iha tinan 2023, ba faze dahuluk nian, Ministériu Edukasaun distribui ona kadeira ho meza rihun 20 territóriu Timor-Leste maibé seidauk sufisiente ba iha eskola hotu-hotu.Tanba ne’e maka iha faze daruak tinan hanesan Ministériu Edukasaun aloka tan orsamentu kuaze $ 800.000 hodi sosa tan karteira hamutuk rihun 8 hodi distribui ba iha pre-eskolár to’o sekundáriu.
“Kazu atuál ne’ebé iha, hanesan eskola ida iha Hera labarik sira tuur de’it iha rai hodi tuir prosesu aprendizaájen no iha eskola balun iha Munisípiu Viqueque la to’o no iha balun ne’ebé kadeira meza at ona,”nia hateten.
Ko’alia kona-ba kadeira no meza sira ne’ebé daudaun ne’e aat ona, Diretór ne’e hateten ekipa téknika sira sei halo manutensaun nune’e estudante sira bele utiliza fila-fali hodi poupa osan Estadu.
“Ministériu nia planu atu halo filafali manutensaun ba kadeira meja ne’ebé at no karik kadeira meza ne’ebé sei bele hadi’a, ita bele fó ba ensinu tékniku vokasionál hodi hadi’a atu nune’e ita mós bele halo poupansa ba ita-nia orsamentu,” nia hateten.
Antes ne’e, Diretór Eskola Sekundáriu Ensinu Tékniku Vokasionál (ESTV) 28 novembru Becora, Manuel Amaral hateten iha ninia eskola sei falta kadeira no meza tanba kadeira no meza maioria aat ona.
“Tanba ita-nia kadeira ho meza kuaze aat no meza mak barak laiha tanba ne’e ita husu ba Ministériu Edukasaun atu tau atensaun ba kadeira ho meza nune’e bele ajuda ita-nia estudante ba prosesu aprendizájen”, nia hateten.
Notísia Relevante :Maioria eskola iha Covalima sei falta ba mobiliáriu no infraestrutura eskolár
Jornalista : Osória Marques
Editór : Agapito dos Santos
