Xefe suku Lalisuk husu autoridade RAEOA hadi’a atendimentu bá tratorista sira
OÉ-CUSSE, 22 fevereiru 2024 (TATOLI) – Xefe suku Lalisuk, Hermenegildo Lalisuk, husu ba Autoridade Rejiaun Administrativa Espesiál Oé-Cusse Ambeno (RAEOA) liuliu Sekretária Rejionál Agrikultura, atu hadi’a atendimentu ba tratorista sira kona-bá direitu saláriu no eskalaun.
Notísia relevante: PA RAEOA lansa adubu orgánika hasa’e produsaun no hamate Lakataru
Lódr komunitáriu ne’e, hato’o nia rekomendasaun, iha ámbitu lansamentu rega adubu orgániku Ako’y Magsasakang Orgániku (AMO), iha natar Holosa, suku Lalisuk, sub-rejiaun Pante Makasar, kinta ne’e.
“Rekomenda de’it ba Sekretária Rejionál Asuntu Agrikultura, ba tratorista sira-nia preokupasaun, primeiru ba saláriu, kada fulan sira simu de’it $171, agora sei sura ho transporte, nia lori ba uma $50 de’it, tanba inklui hahán no sigarru,” Hermenegildo Lalisuk, informa iha ámbitu ne’e.
Autoridade lokál ne’e, relata, trotorista sira, durante ne’e fila-rai ba komunidade sira iha pertense suku Lalisuk, bainhira kuandu fila rai, presiza hahán. Alende ne’e sira balu servisu tinan barak ona, seidauk iha promosaun ba eskalaun.
“Ha’u husu renova sira-nia kontratu no avalia sira-nia servisu nune’e bele sai permanente ona, tanba sira ema tékniku servisu barak iha terrenu, sira barak servisu dezde 2010 to’o agora kontratadu no balu ajente ona maibé seidauk sa’e ba permanente, tán ne’e ho autoridade foun, bele rezolve ona sira-nia nia preokupasaun,” nia husu.
Hatán ba rekomendasaun ne’e, Sekretária Rejionál ba Asuntu Arikultura, Filomena Sila, hateten, kona-bá direitu tratorista sira, prosesa ona hein aprovasaun de’it hosi Prezidente Autoridade RAEOA.
“Ha’u hakarak informa iha ne’e, katak foin lalais ha’u konvida Prezidente Autoridade ba observa mákina dulas hare konsege ko’alia ho tratorista sira hamutuk na’in-14, ne’ebé ha’u simu ona orientasaun, katak nafatin renova sira-nia kontratu, no saláriu aumenta ba $204 kada fulan, tanba antes ne’e simu $171,” nia katak.
Entretantu, kona-bá mákina tratór sira, daudaun ne’e iha unidade unidade 18 ho kondisaun garantidu hodi apoia fila ba komunidade sira iha territóriu Oé-Cusse.
Notísia relevante: Funsionáriu 86 iha agrikultura Oé-Cusse servisu ho voluntáriu
Jornalista: Abílio Elo Nini
Editór: Evaristo Soares Martins
