DILI, 27 fevereiru 2024 (TATOLI)–Diretór Nasionál Ensinu Rekorente iha Ministériu Edukasaun (ME), Alfredo de Araújo, hateten Governu implementa ona programa Analfamór maibé inliteradu kontinua aumenta, tanba ne’e Governu presiza prevee osan no espansa tan programa ne’e hodi fasilita analfabetizasaun sira.
Programa Analfmór ne’e uluk kobre munisípiu hotu maibé bainihira Ministériu Edukasaun entrega kompeténsia ba munisípiu iha 2006, tuir dekretu-lei númeru 3/2016, ne’e rekursu hotu-hotu entrega ba munisípiu tantu profesór, Koordenadór inklui nia orsamentu
Infelizmente iha munisípiu balun la implementa tanba tuir informasaun ne’ebé sira iha no dehan ema analfabetizasaun ne’e laiha ona. maibé faktu ne’ebé tuir sensu 2016 ema analfabetizasaun sei barak tanba iha Ataúro iha 71% mak literadu no 21% inliteradu.
“Hosi dadus ne’e ita bele dehan inliteradu sei barak. Kuandu bolu ema literadu entaun nia akaba ona terseiru siklu, se terseiru siklu mak la akaba mak inliteradu,” Diretór ne’e hateten ba Agência Tatoli iha nia kna’ar fatin, Vila Verde, tersa ne’e.
Nia dehan, programa Analfmór ne’e kobre ba ema-ne’ebé analfabetizasaun no prosesu ensinu durante tinan ida depois kontinua ba ekivalénsia maibé tenke tuir ezame bainihira pasa mak kontinua no bainhira se la pasa labele kontinua.
“Tanba ita mós iha regra katak atu kontinua tenke tuir ezame diagnóstika, liuhosi ne’e mak ita bele hatene katak nia ba primeiru ka segundu siklu ka ba terseiru siklu. Ezame diagnóstika ne’e mak matemátika, edukasaun sívika, portugés, inklui lee hatene no hakerek hatene,” nia esplika.
Jornalista : Osória Marques
Editór : Cancio Ximenes
