Tinan 2023: DNRE atribui ona subsídiu rihun $18 ba SKA neen

DILI, 27 fevereiru 2024 (TATOLI)–Diretór Dirasaun Nasionál Ensinu Rekorrente iha Ministériu Edukasaun (ME), Alfredo de Araújo, hateten iha tinan 2023 ne’e Dirasaun Nasionál Ensinu Rekorrente (DNER) atribui ona subsídiu rihun $3 ba Sentru Komunitária Aprendizajen (SKA) neen (6) iha Timor-Leste ne’ebé sira-nia estrutura kompleta ona.

Notísia Relevante: Profesór apoiu atividade iha SKA preokupa ho estatutu

“Ita fó ona subsídiu ba SKA neen (6) ne’ebé nia estrutura la’o di’ak ona. Tinan 2023 ne’e, kada SKA hetan rihun $3 mak hanesan SKA Baucau Kreativu, Bobonaro Kuda Ulun, Manufahi, Manatuto Rentau, Dili iha Cristo Rei no Vera Crus. Ita propoin SKA 10 maibé SKA haat la liu tanba la prienxe rekezitu,” Diretór ne’e ne’e hateten ba Agência Tatoli iha nia kna’ar fatin, Vila Verde, tersa ne’e.Ida-ne’e, nia dehan, tinan kotuk nian no ne’ebé Dirasaun Nasionál Ensinu Rekorrente (DNER) haruka ona ba sira-nia konta bankária.

Iha tinan 2024, Dirasaun Nasionál Ensinu Rekorrente (DNER) propoin ba Sentru Komunitária Aprendizajen (SKA) hamutuk 15, no sei hein katak hosi SKA hirak ne’e, hira mak sei hetan subsídiu hosi Governu.

Tanba ne’e, Dirasaun Nasionál Ensinu Rekorente (DNER) rekomenda atu kontinua abranje to’o sekundáriu jerál ne’e hanesan programa prioridade ida.

“Ami sei halo tentativa ida ho parseiru dezenvolvimentu balun ne’ebé ajuda, nune’e halo estudu kle’an hodi halo fornesimentu ekivalénsia ba ensinu sekundáriu jerál. Ida-ne’e prioridade maibé ita seidauk bele implementa iha tinan ne’e,” nia dehan.

Maibé, nia dehan, primeiru kria uluk kondisaun tanba objetivu ne’ebé estabelese ensinu sekundáriu mak mínimu mak iha ona profesór, kurríkulu própriu, manuál, ensinu sekundáriu jerál estabelesidu iha diploma ministeriál depois profesór rekrutadu.

Tanba ne’e, Ministériu Edukasaun ho parseiru planu ona oinsá estabelese ekivalénsia ensinu sekundáriu jerál maibé tenke 50% ba ensinu sekundáriu jerál no 50% ba ensinu tékniku vokasionál, maibé sira-ne’e hotu presiza iha kondisaun mínimu rekursu umanu.

“Ami ho UNESCO verbalmente halo ona diskusaun hodi bele ajuda no tinan ida-ne’e pelumenus ho estudu ida. Fatin ba ha’u ladún iha kestaun tanba ita bele utiliza SKA. Importante no prioridade mak profesór ne’ebé atu hanorin no diploma ministeriál ba sekundáriu,” nia hateten.

Notísia Relevante: KNTL-UNESCO apoiu fundu harii Sentru Aprendizajen Komunitária tolu

Jornalista : Osória Marques

Editór      : Cancio Ximenes