DILI, 29 fevereiru 2024 (TATOLI) – Prezidente Federasaun Atletizmu Timor-Leste (FATL), Afrânio Xavier Amarál, hatete daudaun prepara ona atleta na’in-10 atu bá kompete iha jogu iha Komunidade lian Portugés (CPLP-sigla Portugés)
“Jogu CPLP nian ita prepara ona atleta hamutuk-10, hosi na’in-10 ne’e feto lima mane lima, agora sira hahú ona halo preparasaun, maibé iha fulan-abríl realiza kampionatu nasionál haree atleta balun hatudu prestasaun ita sei hili atu kompleta númeru ne’ebé ita tarjetu ba jogu CPLP,” Afrânio hatete ba Agência TATOLI iha Jináziu Dili, kinta ne’e.
Ho preparasaun ne’ebé hala’o tempu naruk lideransa Federasaun Atletizmu ne’e otimista sei hatudu rezultadu ne’ebé di’ak.
Tuir kritéria ne’ebé iha jogu CPLP sei fó liu prioridade ba atleta hotu ne’ebé kompete ho idade juniór hosi tinan 16 mai kraik.
Rekorda fali katak, CPLP liuhosi konferénsia Ministériu Juventude no Desportu ba dala XIV, iha Luanda, hosi nasaun hamutuk sia aprova ho votu unaminidade ba proposta Timor-Leste nian ne’ebé husu atu sai uma-nain ba jogu CPLP iha 2025.
Kandidatura Timor-Leste nian hodi sai uma-na’in ne’e aprezenta direta hosi Ministru Juventude, Desportu, Arte no Kultura, (MJDAK), Nélio Isaac Sarmento no hetan votu unamidade hosi
Nasaun membru sira hanesan Angola, Brazil, Cabo Verde, Guinne-Bissau, Guinne Equtorial, Mosambique, São Tome e Principe no Portugal.
Hafoin deklara kandidatura, Diretor Nasional Desportu MJDAK, Cesarino da Silva halo kedan aprezentasaun ba preparasaun téknika Timor-Leste nian, iha ne’ebé jogu ne’e sei iha kompetisaun ba modalidade sia mak hanesan, Atletizmu, Basketból 3×3, Voleiból Praia, Tenis Kampu, Futeból, Taekwondo, Karate-do no Xadres, inklui mós iha Atletizmu Paralímpiku.
Jogu CPLP ne’e sei implementa iha loron 17-27 Jullu tinan 2025 ne’ebé sei kompete entre nasaun CPLP hotu.
Ho nune’e, Sekretáriu Estadu Juventude no Desportu Portugal, João Paulo Correia, iha konferénsia ne’e deklara katak Portugal sei fó apoia téknika ba Timor-Leste ba jogu desportiva ne’e.
Notísia relevante: MJDAK aprova ona fundu ba Karate-do no Atletizmu realiza kampionatu nasionál
Jornalista : Hortencio Sanchez
Editór : Florencio Miranda Ximenes
