ME haruka karta ba KFP suspende profesór baku estudante

DILI, 29 fevereiru 2024 (TATOLI)—Ministra Edukasaun (ME), Dulce de Jesus Soares, hateten Ministériu Edukasaun haruka karta ba Komisaun Funsaun Públika (KFP) hodi suspende imediata profesór ne’ebé baku estudante iha prosesu aprendizajen iha Eskola Tékniku Vokasionál (ESTV) Becora.

Notísia Relevante: Profesór rekoñese baku estudante iha prosesu aprendizajen

“Ministériu Edukasaun halo karta ba Komisaun Funsaun Públika hodi husu suspende imediata profesór ne’ebé halo agresaun fíziku hasoru estudante iha sala-de-aula. Ohin, ha’u simu ona karta katak KFP fó ona karta ba profesór. Ida-ne’e tanba tuir estatutu karreira dos educadores da infância do professor ensinu básico e ensinu secundário katak profesór ne’e tuir loloos sai ema ne’ebé mak tenke garante protesaun ba dezenvolvimentu fíziku, psikolójiku estudante sira-nian iha sala laran no iha resintu eskola nian,” Ministra Dulce hateten ba jornalista sira, hafoin halo enkontru ho profesór no estudante vítima ne’e iha salaun VIP, Vila Verde, kinta ne’e.

Maibé, nia dehan, profesór ida-ne’ebé halo violénsia ne’e tuir estatutu karreira dosente ne’e, Ministériu Edukasaun horisehik halo kedas karta ba Komisaun Funsaun Públika hodi halo suspensaun imidiate ka bazea ba regra tuir Komisaun Funsaun Públika nian.

“Ohin dadeer, ha’u bolu profesór ne’ebé mak halo violénsia iha eskola Tékniku Vokasionál (ESTV) Becora no profesór mós koopera hodi suspende. Halo suspensaun maibé sujeitu investigasun kontinua ba oin ne’e oinsá, entaun suspensaun ne’e imediata hodi ohin ba oin labele hakbesik-aan ba eskola refere. Nia tenke hadook-aan hosi eskola. Ida-ne’e hanesan faze primeiru, depois sei haree ba futuru,” nia dhaktuir.

Ho video profesór baku estudante ne’ebé viral iha rede sosiál ne’e, nu’udar Ministra Edukasaun nafatin fó fó korajen ba estudante ne’ebé sai vítima ho nia família, no nia parte kontinua garante katak hahalok ida-ne’e sei la akontese tan iha futuru.

“Ha’u hanesan inan ida, la’ós ministra, mós sente saida mak ita-boot sente, nune’e alin lalika tauk ba fali eskola. Ha’u garante katak sei la’o di’ak no tempu badak ita sei hamutuk nahe biti boot hodi rezolve,” ministra ne’e fó korajen.

Governante ne’e hatutan, sei halo komunikasaun ida-ne’ebé mak di’ak entre profesór no estudante, inklui komunidade edukativa tomak, nune’e bele halakon tiha problema violénsia iha eskola,

Bainhira suspende profesór ida karik profesór refere ninia saláriu ne’e la’o fanesan babain,  ministra ne’e hatán, ida-ne’e depende ba regra hosi Komisaun Funsaun Públika (KFP) tanba kestaun ida-ne’e fora hosi Ministériu Edukasaun (ME) nia kompeténsia.

Profesór Pedro da Conceição ne’ebé hetan suspensaun ne’e hateten, iha suspensaun ne’e la ko’alia kona-ba saláriu (osan) no suspende to’o tinan hira maibé dehan de’it fó suspensaun.

“Ha’u prontu simu suspensaun ida-ne’e, tanba ha’u koopera ho superiór iha Ministeriu ida-ne’e. Ohin, mai iha Ministériu Edukasaun (ME) ne’e atu koopera, tanba aktu ne’ebé ha’u halo ne’e kontra regra. Tanba ne’e, bainhira fó suspensaun ne’e, ha’u simu 100%. Ha’u simu buat saida mak ministériu fó mai ha’u. Suspende lahó saláriu ka iha saláriu ne’e, depende ba desziaun hosi superior sira,” nia dehan.

Reprezentante família vítima (estudante Jose Alipio Walter Gusmão ho idade 17 nia inan), Olga Lopes, hateten vídeo profesór baku estudante virál ne’e bele fanun profesór sira inklui parte relevante hodi oinsá tau matan ba estudante sira.

“Ho motivasaun no korajen hosi Ministra, nune’e aban ha’u lori ha’u-nia oan ba eskola tanba ohin ministra dehan profesór ne’e la hanorin ona. Entaun, ha’u kontente tebes no ha’u la tauk ona,” nia hateten.

Jornalista : Osória Marques

Editór         : Cancio Ximenes