iklan

INTERNASIONÁL, BAUCAU

PNUD-Governu sei inaugura Estrada rurál kilometru 3,7 iha Lavateri

PNUD-Governu sei inaugura Estrada rurál kilometru 3,7 iha Lavateri

Estrada rural.Imajen TATOLI

DILI, 29 fevereiru 2024 (TATOLI) – Programa Nasaun Unida ba Dezenvolvimentu (PNUD) hamutuk ho Governu liuhusi Ministériu Obras Públika (MOP) no Ministériu Administrasaun Estatál (MAE), inklui autoridade Munisípiu Baucau, sei inaugura estrada rurál ho distánsia kilometru 3,7, iha Aldeia Onor Tibalari, Suku Lavateri, Postu administrativu Laga, Munisípiu Baucau, tersa (05/03) semana oin.

Estrada rurál ne’e konstrui ho totál orsamentu hamutuk US$ 240,885.865.

“Konstrusaun estrada rurál iha Aldeia Onor Tibalari, Suku Lavateri, Postu administrativu Laga, Munisípiu Baucau, hanesan konstrusaun ida ne’ebé mak reziliente ba inundasaun kauza husi mudansa klimátika ho maneira bioenjiñeira no agrofloresta (hodi prevene Estrada husi rai-halai ka rai-monu durannte tempu udan ka inundasan),” PNUD esplika liuhusi komunikadu imprensa diriji ba Agência TATOLI, ohin.

Konstrusaun Estrada rurál ne’e, tuir PNUD, sei fó benefísiu direta ba Suku Lavateri ho aldeia haat hanesan Onor Tibalari, Ledana, Osso Isi Lari no Uabubo ho totál populasaun hamutuk uma-kain 214.

“Ho konstrusaun Estrada rurál ida ne’e bele ajuda ona populasaun hodi asesu ba fasilita sira seluk hanesan saúde, edukasaun no merkadu,” PNUD sita iha komunikadu ne’e.

Konstrusaun Estrada ida ne’e resbonsabiliza husi Kompania CUBA no konstrusaun ne’e rasik hahú asina kontratu iha loron 22 dezembru 2023.

Estrada ne’ebé lokaliza iha Munisípiu Baucau ne’e, PNUD hala’o liuhusi projetu ‘Salva-guarda komunidade rurál no sira-nia asset fíziku husi dezastre klimátika iha Timor-Leste’.

Projetu ida ne’e hanesan projetu ida ne’ebé mak hetan fundu Klimátika Verde (GCF), Governu Timor-Leste no PNUD. Projetu ida ne’e ho durasaun husi marsu 2020 to’o marsu 2026.

Atividade ne’ebé mak implementa husi projetu ida ne’e mak hanesan Mapamentu área risku iha territóriu Timor-Leste, Implementasaun infraestrutura ne’ebé mak reziliente ba klimátika iha munisípiu neen hanesan Aileu, Ermera, Baucau, Liquiça, Lautem no Viqueque, no, Kapasitasaun ba funsionáriu Governu iha nível nasionál no munisípiu neen mensionadu.

 

Tatoli

iklan
iklan

Leave a Reply

iklan
error: Content is protected !!