iklan

INTERNASIONÁL, DILI, HEADLINE

MNEK-SETP sei servisu hamutuk oferese rai ba Reinu Unidu harii Embaixada

MNEK-SETP sei servisu hamutuk oferese rai ba Reinu Unidu harii Embaixada

Diretór Jerál Asuntu Bilaterál Minstériu Negósiu Estranjeiru no Kooperasaun (MNEK), Francisco Dionisio "Maucura"

DILI, 04 marsu 2024 (TATOLI) – Diretór Jerál Asuntu Bilaterál iha Ministériu Negósiu Estranjeiru no Kooperasaun (MNEK), Francisco Dionisio “Maucura”,  hateten, sei koordena ho Sekretáriu Estadu Terra Propriedade (SETP), nune’e bele oferese rai ba Reinu Unidu hodi harii  nia Embaixada iha Timor-Leste.

“Loos, Reinu Unidu hakarak atu loke sira nia Embaixada iha Timor-Leste tanba semana kotuk Ministra Estadu Asuntu Azia Pasifiku hasoru malu ho ita nia Primeiru Ministru mak ko’alia sira konfirmadu ona. Hosi ita nia parte MNEK sei servisu ho SETP oinsá atu haree rai ruma atu sira bele loke sira nia Embaixada,”Diretór Maucura hatete ba Agência TATOLI iha edifísiu MNEK, segunda ne’e.

Daudaun ne’e relasaun entre Timor-Leste ho Reinu Unidu la’o di’ak tebes no iha tempu besik Reinu Unidu harii tan Embaixada iha Timor-Leste bele hametin liután relasaun bilaterál entre nasaun rua.

“Fatin ba sira atu harí Embaixada seidauk serteza, ita sei koordena ho Ministériu Justisa liuliu SETP, tanba ne’e sira nia responsabilidade tanba MNEK nia hakarak oinsá ita bele oferese fatin di’ak no apropriadu no adekuadu ba ita nia belun sira,” nia katak.

MNEK haree iha área Dili laran liuliu diresaun tasi ibun mak hanesan fatin di’ak ba Reinu Unidu atu harii Embaixada, maibé sei konsulta ho SETP.

“Ita tenke trata sira ho di’ak tanba sira mós trata ita nia ema sira iha Inglaterra ho di’ak tebes. Entermus jeografia Europa ho Azia maibé ita nia relasaun metin tebes, ita nia Embaixada iha ne’ebá mós sira trata di’ak tebes. Inglaterra konsege fó ona servisu ba ita nia maluk timoroan rihun resin hodi haruka fali osan mai Timor-Leste,” nia konklui.

Notísia relevante: Reinu Unidu hakarak loke Embaixada iha Dili

Jornalista: Hortencio Sanchez

Editór    : Florencio Miranda Ximenes

iklan
iklan

Leave a Reply

iklan
error: Content is protected !!