iklan

HEADLINE, KAPITÁL

Reinu Unidu hakarak loke Embaixada iha Dili

Reinu Unidu hakarak loke Embaixada iha Dili

Primeiru-Ministru, Kay Rala Xanana Gusmão, hamutuk ho ekipa, hala’o enkontru ho Ministra Estadu Reinu Unidu ba Indo-Pásifiku, Anne Marie Trevelyan, ho nia delegasaun, iha Gabinete Fronteira Marrítima no Terrestre, Palásiu Governu, sesta (01/02/2024). Imajen Tatoli/António Daciparu

DILI, 01 marsu 2024 (TATOLI)Primeiru-Ministru (PM), Kay Rala Xanana Gusmão, sesta ne’e, simu vizita hosi Ministra Estadu Reinu Unidu ba Indo-Pásifiku, Anne Marie Trevelyan.

“Ministra Anne-Marie, nia mai Timor dala-rua ona, tinan kotuk mai iha fulan-outubru. Agora mai tan dala-ida hodi espresa la’ós solidariedade mai Timor-Leste maibé atu ko’alia kona-ba nia serbisu, ne’ebé la’ós iha ita de’it. Reinu Unidu deklara katak sira hakarak loke sira-nia embaixada iha Timor, tanba ne’e maka Ministériu Negósiu Estranjeiru no Kooperasaun sei haree hodi prepara kondisaun tanba sira hakarak rezidente permanente iha ita-nia rain,” PM Xanana hateten hafoin simu vizita Ministra Anne-Marie, iha Gabinete Fronteira Marrítima no Terrestre, iha Palásiu Governu.

Xanana agradese ba Reinu Unidu tanba kria ona kondisaun hodi timor-oan rihun 40 resin mak serbisu no hela iha ne’ebá.

“Agradese tebes tanba sira ba ho pasaporte portugés maibé sira nu’udar timor-oan. Ba sira ne’ebé mak uza pasaporte Timor, agora Ministériu Justisa sei koloka tékniku ba Reinu Unidu hodi rezolve sira-nia pasaporte ne’ebé liu ona prazu,” nia akresenta.

Antes ne’e, durante Prezidente Repúblika, José Ramos Horta halo vizita bá Reinu Unidu, hasoru Sekretáriu Estadu ba Asuntu Estranjeiru Reinu Unidu, David Cameron, hodi toka ba posibilidade balun ne’ebé Reinu Unidu sei apoia.

Durante enkontru ne’e, Xefe Governu ho governante Reinu Unidu ko’alia asuntu barak kona-ba mundu, rejiaun, no Timor rasik.

Notísia relevante : Reinu Unidu komprometidu nafatin simu timor-oan

Xanana iha biban ne’e agradese tebes ba Ministra ba Indo-Pásifiku, ne’ebé hato’o mós intensaun hakarak apoia iha área oioin, hanesan adezaun Timor ba Organizasaun Mundiál Komérsiu (OMK), ASEAN, no área seluk hanesan nutrisaun, edukasaun no saúde.

Iha biban hanesan, Ministra Estadu Reinu Unidu ba Indo-Pásifiku, Anne Marie Trevelyan, sente onra boot hodi vizita dala-ida tan.

“Hasoru malu ho Primeiru-Ministru ho laran kontente, ha’u hakarak fó sai katak Governu Reinu Unidu sei loke nia Embaixada iha Dili hanesan kompromisu ida,” Anne Marie deklara.

Nia kontente tanba Governu Reunu Unidu bele fó influénsia di’ak ba povu Timor-Leste tomak.

“Entaun di’ak tebes atu Reinu Unidu iha nia rezidénsia permanente iha Timor-Leste hanesan etapa ida ba relasaun bilaterál, ida-ne’e mós hola parte ba vizita hosi Prezidente Ramos Horta ba Reinu Unidu foin lalais. Ha’u hein hela atubele harii Embaixada iha Dili hodi bele kontinua ita-nia serbisu hamutuk apoia Timor-Leste ba dezenvolvimentu ekonomia no sustentabilidade nasaun,” nia tenik.

Anne-Marie konsidera Timor-Leste hanesan nasaun ida importante tebes ba Reinu Unidu, tanba bainhira nia vizita iha outubru tinan kotuk, nu’udar vizita dahuluk Governu Reinu Unidu mai Timor, nita katak nu’udar nasaun ne’ebé foin ukun-an. Aleinde ne’e, Reinu Unidu konsidera Timor-Leste nu’udar amigu di’ak.

Jornalista     : Antónia Gusmão

Editora          : Julia Chatarina

iklan
iklan

Leave a Reply

iklan
error: Content is protected !!