DILI, 29 setembru 2023 (TATOLI)—Primeiru-Ministru (PM), Kay Rala Xanana Gusmão, sesta ne’e, simu vizita hosi Ministra Estadu Reinu Unidu ba Indo-Pasífiku, Anne-Marie Trevelyan.
“Ha’u agradese tebes ba nia tanba ita iha timor-oan liu rihun 20 maka serbisu iha Reinu Unidu ne’ebá. Nia dehan foin lalais mosu problema hanesan pasaporte no viza, maibé nia dehan katak la’ós problema ida-ne’e, problema maka timor-oan balun hakarak tama ho ilegál, ida-ne’e mak labele, maibé nia mós dehan katak Reinu Unidu prontu atu simu tan timor-oan sira bá serbisu,” Xanana hateten hafoin ramata reuniaun ho Ministra Estadu, iha Gabinete Fronteira Marrítima, iha Palásiu Governu.
Biban ne’e, Xefe Governu apresia tanba durante timor-oan sira serbisu iha Reinu Unidu, iha área ne’ebé di’ak tebes no bainhira sira fila Timor bele utiliza prátika di’ak sira hodi hala’o serbisu iha rai-laran.
“Ha’u agradese tebes ba sira tanba tinan hirak liubá ha’u bá Reinu Unidu hodi hasoru malu ho timor-oan sira iha ne’ebá, sira serbisu kapas, balun serbisu iha área ne’ebé ita ikus mai bele aproveita bainhira ita dada kadoras mai. Ne’ebé vizita ne’e hanesan onra boot ida ba ita tanba foin dahuluk membru Governu hosi Reinu Unidu mai to’o iha ita, ne’ebé ita agradese tebes mai ita to’o agora no sira mós nafatin preparadu hodi apoia dezenvolvimentu Timor-Leste”, nia akresenta.
Notísia relevante : Hahú 16 agostu, timor-oan tama Reinu Unidu presiza hetan vistu
Aleinde ne’e, Ministra Reinu Unidu ne’e hato’o apoia tomak ba Timor-Leste nia adezaun ba membru plenu Asosiasaun Nasaun Sudeste Aziátiku (ASEAN, sigla inglés), liu-liu iha kapasitasaun rekursu umanu no lian inglés.
Iha fatim hanesan, Ministra Anne-Marie Trevelyan, sente onradu tebes tanba bele vizita Timor-Leste, ne’ebé entidade Estadu sira simu ho aktu estraordinária hosi entidade Estadu.
“Ha’u hatene katak ami koopera di’ak durante tinan barak no ha’u espera bele hametin kooperasaun ne’ebé di’ak liután iha futuru hodi apoia Timor-Leste nu’udar membru plenu ASEAN hodi dezenvolve ekonomia no atu fó oportunidade ba ninia povu. Ha’u hatene Timor hanesan nasaun furak ho nia biodiversidade,” nia tenik.
Diplomata ne’e dehan, durante ne’e Reinu Unidu simu timor-oan sira ho di’ak no sei kontinua, nune’e iha esperansa katak timor-oan sei bele sai parte hosi ekonomia Inglatera hodi bele apoia traballadór nia família.
Enkuantu, liga ho ASEAN nian, Reinu Unidu sei apoia Timor-Leste iha área oin-oin, hanesan kapasitasaun lian inglés no eluk tan.
“Espera katak bele serbisu ho Governu hodi la’o tuir programa sira ne’ebé prevee ona iha roteiru. Hau-nia ekipa iha Jakarta sei kontinua hamutuk ho ita-nia Governu,” nia salienta.
Jornalista : Antónia Gusmão
Editora : Julia Chatarina
