Hahú 16 agostu, timor-oan tama Reinu Unidu presiza hetan vistu

DILI, 20 jullu 2023 (TATOLI)—Governu Reinu Unidu fó sai informasaun iha kuarta (19/07), ne’ebé ho efeitu imidiatu, katak hahú loron 16 agostu 2023, bainhira timor-oan atu halo viajen ba Reinu Unidu tenke iha vistu.
“Mudansa sira ne’e sei aplika ba nasionalidade timor-oan hotu ne’ebé mak tama ba Reinu Unidu. Maibé, sei iha períodu tranzisaun durante semana-haat to’o oras 15:00 BST (tempu veraun Británika nian) loron 16 agostu. Durante tempu ne’e vizitante sira ne’ebé rezerva ona sira-nia viajen molok oras 15:00 BST loron 19 jullu sei bele tama ba Reinu Unidu sei la uza vistu,” refere nota ne’ebé Agência Tatoli asesu, kinta ne’e.
Aleinde ne’e, pasajeiru sé de’it mak tama Reinu Unidu hafoin loron 16 agostu tenke iha vistu. Nune’e mós, hirak ne’ebé rezerva ona viajen hafoin 15:00 BST 19 jullu mós presiza iha vistu, maski atu tama molok 15:00 BST 16 jullu.
Regulamentu ba vistu ne’e tanba haree timor-oan barak mak bá vizita Reinu Unidu ho tempu naruk no tama la’ós atu halo vizita de’it maibé atu serbisu ilegalmente, ne’ebé dalabarak reklama nu’udar dependente hosi ema nasionalidade Uniaun Europeia (UE) ka hela iha Reinu Unidu.
“Desizaun atu impór rejime vistu ba nasionalidade timor-oan sira ne’e lori ami tama iha liña ida ho prátika parseiru internasionál sira inklui Irlanda, EU, Amérika, Kanadá no Nova Zelándia,” nota ne’e esplika.
Notísia relevante : Timor-oan iha Reinu Unidu presiza instalasaun ba renovasaun pasaporte
Ba vizitante timor-oan ne’ebé mak iha ona Reinu Unidu sei la afetadu ho rekerimentu foun ne’e ba durasaun tempu sira-nia vizita nian, maibé bainhira sira sai hosi Reinu Unidu ona, no atu tama fali, sira presiza hetan vistu Reinu Unidu nian.
Nasionalidade timor-oan tuir rekerimentu tenke hetan vistu ba objetivu seluk (la’ós vizita nian), ba eskola ka serbisu. Aplikante estudante ka ba vistu seluk bele kontinua aplika nafatin, hanesan halo tiha ona iha tempu sira liubá.
Embaixadór Británika ba Indonézia no Timor-Leste, Owen Jenkins, esplika, mudansa hirak ne’e lori Timor-Leste tama iha liña ida ho vistu nasionalidade hanesan rai sira seluk mak Reinu Unidu iha relasaun amigável ho sira. Vistu sira ne’e fornese asesu ba Reinu Unidu no tulun país ne’e atu asegura fronteira.
Aleinde ne’e, Governu Reinu Unidu garante katak mudansa ne’e sei implementa ho di’ak, inklui introdusaun prosesu tranzisaun ida ba individuál sira ne’ebé mak rezerva ona sira-nia viajen.
“Ho nune’e, timor-oan sira sei bele kontinua hamutuk ho vizitante hosi nasaun sira seluk iha Reinu Unidu. Oras ne’e daudaun Reinu Unidu iha ona kooperasaun ho Timor-Leste inklui fó apoiu tomak ba Timor-Leste nia adezaun ba ASEAN. Ami explora opurtunidade sira hodi apoia Timor-Leste iha setór oin-oin, partikularmente dezenvolvimentu ekonomia, saúde no nutrisaun, adaptasaun klimátika no reziliénsia,” Diplomata ne’e dehan.
Vistu ne’ebé timor-oan bele uza hodi tama iha Reinu Unidu mak hanesan vistu turizmu, negósiu, no eskola (kursu sira ne’ebé liu fulan-neen) inklui atividade seluk ne’ebé permite iha vistu, bele hela iha Reinu Unidu durante fulan-neen no iha opurtunidade atu aplika hela kleur liután tuir sirkunstánsia balun.
Timor-oan sira ne’ebé atu tama Reinu Unidu tuir aplikasaun vistu submete no selu tuir online iha enderresu www.gov.uk/apply-to-come-to-the-uk, hafoin aplikante sira marka tiha ona ho sentru aplikasaun vistu no fó sira-nia biométriku, ikus mai entrega aplikante nia pasaporte.
Governu Reinu Unidu hakarak prosesa aplikasaun hotu iha loron 15 nia-laran, tuir loron serbisu Reinu Unidu nian bainhira simu pasaporte ho biométriku no aplikante sira bele hatama aplikasaun fulan-tolu antes.
Kustu ba vistu ida atu tama multiplu durante fulan-neen ba Reinu Unidu bele hetan iha visa fees – GOV.UK (www.gov.uk) inklui disponível mós vistu ho validade kleur liu.
Jornalista : Arminda Fonseca
Editora : Julia Chatarina

