DILI, 04 marsu 2024 (TATOLI) – Diretór Jerál Asuntu Bilaterál iha Minstériu Negósiu Estranjeiru no Kooperasaun (MNEK), Francisco Dionisio “Maucura”, informa, semana oin ró ahi militár hosi nasaun Fransa sei vizita Timor-Leste.
“Ró militár Fransa nian ne’ebé sei mai semana oin ne’e hanesan vizita ida hosi belun ba belun, aban bainrua ita iha ró militár fali mós ita sei ba vizita mós sira nia nasaun,” Maucura hatete ba Agência TATOLI iha edifisiu MNEK, segunda ne’e.
Nia dehan, vizita ne’e atu promove mós relasaun diplomátiku entre Fransa ho Timor-Leste.
“Vizita ne’e atu hametin liutan ita nia relasaun entre nasaun rua, ita hatene katak Fransa nia-relasaun di’ak tebes ho Timor-Leste,” nia afirma.
Tuir oráriu tentativa ne’ebé Agência TATOLI asesu ró ne’e sei to’o Timor-Leste iha loron 11 fulan-marsu tinan ne’e.
Tuir Diretór ne’e, durante tinan ida ne’e Timor-Leste sei hetan vizita hosi ró militár hosi nasaun lubuk ida hanesan Australia, Japaun.
“Vizita ró militár sira ne’e atu hatudu katak ita nia lokalizasaun ne’e estrat’ejiku tebes tanba Timor-Leste ne’e lokaliza iha baliza entre Azia no Pasifiku, entaun ho vizita sira ne’e atu hametin liutan ita nia relasaun,” nia relata.
Notisia relevante: PM Xanana simu vizita Konselleiru Fransa no Embaixadór Mpetjane
Jornalista: Hortencio Sanchez
Editór : Florencio Miranda Ximenes
