SEATOU orienta Jestaun Merkadu Bobonaro kontrola jogu ilísitu
BOBONARO, 07 marsu 2024 (TATOLI)-Sekretáriu Estadu Asuntu Toponímia no Organizasaun Urbana (SEATOU), Germano Santa Birtes, husu Diresaun Servisu Munisipál, Autoridade Munisípiu Bobonaro atu serbisu hamutuk ho Polísia Nasionál Timor-Leste hodi kontrola jogu ilisítu sira hanesan bola guling no kuru-kuru ne’ebé komunidade loke iha atividade feira no iha espasu públiku hanesan jardín no dalan-ninin.
Nia hato’o asuntu ne’e durante serimónia pose ba Prezidente Autoridade Munisipál Bobonaro, Alexandrino Pires, iha Jináziu Maliana, kuarta ne’e.
“Ba servisu jestaun merkadu halo kontrolu no labele autoriza jogu bola guling iha espasu publiku, bola guling ho kuru-kuru laiha lisensa, jestaun merkadu ho polísia tenke foti hotu liuliu iha feira laran, tanba feira ne’e ema atu fa’an produtu lokál, la’ós ba loke tali jogu,” nia hateten.
Governante ne’e mos apela ba ekipa Jestaun Merkadu atu kontrola komunidade ne’ebé halo atividade negósiu okupa espasu públiku.
Nia hatutan, atu servisu hirak-ne’e la’o ho di’ak Prezidente Autoridade Munisipál Bobonaro no Jestaun Merkadu presiza forma ekipa konjunta atubele hamoos sidade sai fatin organizadu.
Nia afirma, bainhira komunidade no negosiante sira la obesede regra no lakoi koopera ho ekipa, sei hetan sansaun.
“Ha’u hakarak atu hato’o ba ita hotu kona-ba responsabilidade prinsipál hosi kompeténsia balun ne’ebé sita iha artigu 7 no despaxu no 2/2023 hosi ministru, atu haree Servisu Toponímia no Organizasaun Urbana, ne’ebé mak atu organiza espasu públiku. Ba sé de’it maka kontra regra sei hetan sansaun hatu’ur iha Dekretu lei No.33/2008 hetan Alterasaun Primeira ba Dekretu-lei no 3/2024,” nia argumenta.
Notísia relevante: SEATOU sobu barraka negosiante iha Ai-mutin no muda bá Merkadu Manleuana
Jornalista: Sérgio da Cruz
Editór: Evaristo Soares Martins
