iklan

INTERNASIONÁL, DILI, HEADLINE

Fransa hakarak apoia Timor-Leste hodi dezenvolve área turizmu no agrikultura

Fransa hakarak apoia Timor-Leste hodi dezenvolve área turizmu no agrikultura

Prezidente Repúblika, Jose Ramos-Horta, enkontru ho Embaixadór Repúblika Franseza, Fabien Penone. Iha Palásiu Prezidensiál, Bairru-Pité, segunda (11/03). Imajen Tatoli/Egas Cristóvão

DILI, 11 marsu 2024 (TATOLI) – Prezidente Repúblika (PR), José Ramos Horta, hasoru malu ho Embaixadór Fransa ba Indonézia, Timor-Leste no ASEAN, Fabian Penone, hodi ko’alia atu hametin relasaun no kooperasaun billaterál rentre nasaun rua liuliu hakarak apoia Timor-Leste hodi dezenvolve área turizmu no agrikultura.

“Ami ko’alia kona-bá dezenvolvimentu Timor-Leste nian. Pontu importante ami ko’alia mak ita halo kooperasaun iha área negósiu, ekonomia, turizmu no agrikultura, atu nune’e bele aseleira dezenvolvimentu iha Timor-Leste,” hatete Embaixadór Fabian ba jornalista sira iha Palásiu Prezidensiál Dili, segunda ne’e.

Embaixadór Fransa ba Indonézia, Timor-Leste no ASEAN, Fabian Penone. Imajen/TATOLI

Iha área ekonomia, nia dehan Fransa mós hakarak halo kooperasaun ho Timor-Leste iha área seguransa liuliu iha área maritíma nian.

“Importante mós ba ita atu halo kooperasaun iha área seguransa nian, liliu iha área tasi nian,” nia hatete.

Nia hatutan Fransa mós hakarak haforsa kooperasaun iha ASEAN no suporta Timor-Leste nia adezaun.

Tanba ne’e, relasaun entre nasaun rua metin liutan ba oin no Fransa prontu apoiu iha área saida de’it mak Timor-Leste presiza ba dezenvolvimentu.

Kapasitasaun ba rekursu umanu

Iha sorin seluk, Embaixadór Fransa ne’e hasoru malu mós ho Ministru Negósiu Estranjeiru no Kooperasaun (MNEK), Bendito Freitas ko’alia kona-ba oinsa Fransa nia pozisaun apoiu Timor-Leste halo kapasitasaun ba rekursu umanu.

“Fransa demonstra kompromisiu ne’ebé bo’ot tebes tanba sira hakarak hahú página foun kooperasaun ne’ebé firme no forte ba oin ho Timor-Leste iha área kapasitasaun rekursu umanu, reforma administrasaun nian no parte seluk mós haree kona-ba ekonomia no investimentu, asuntu sira ne’e Fransa prontu no disponível tebes atu hahú ko’alia ho ita no ida ne’e nu’udar mós rezultadu hosi vizita Presidente Repúblika ba iha Fransa hodi hasoru malu ho nia omólogo Prezidente Emmanuel Macron,” tenik Ministru Bendito.

“Ne’e hanesan pasu-ida importante tanba sira desesivu tebes hodi fó assistênsia mai ita ho másimu ba ita nia adezaun ba ASEAN no Fransa mós hakarak marka istória ligasaun ida ho Timor-Leste tanba prinsipiu valór ne’ebé komunga entre ita ho Fransa, liuliu valór kona-ba respeitu ba demokrasia no direitu umanu, ida ne’e sira sente kontente no haree Timor-Leste hanesan nasaun ida úniku iha Azia ne’ebé nia valór importante,” afirma.

Notisia relevante: PM Xanana: nasaun 11 hakarak mai halo investimentu iha Timor-Leste  

Jornalista: Hortencio Sanchez

Editór        : Florencio Miranda Ximenes

iklan
iklan

Leave a Reply

iklan
error: Content is protected !!