Ezame ba kandidatu profesór nu’udar pontu partida ne’ebé transparánsia

DILI, 15 marsu 2024 (TATOLI)—Prezidente Parlamentu Nasionál (PPN), Maria Fernanda Lay, hateten ezame kandidatu profesór sai nu’udar pontu partida ne’ebé transparánsia ba funsionáriu sira iha Timor-Leste.

Notísia Relevante: PM dejeza kandidatu profesór 13.021 tuir ezame eskrita labele lakon esperansa

“Ohin ne’e, importante liu hanesan Primeiru-Ministru, Kay Xanana Gusmão, hateten katak ida-ne’e pontu partida ida-ne’ebé di’ak tebes para iha transparánsia iha funsionáriu. Ida-ne’e duni mak ita presiza, lalika haree kór, partidu, nepotizmu, famaliarismu ne’e. Entaun, ha’u hakarak enkoraja ministériu hotu-hotu inklui funsionáriu Parlamentu Nasionál rasik halo sistema ida hanesan ne’e,” PPN ne’e hateten ba jornalista sira hafoin partisipa abertura ezame eskrita ba profesór sira liuhosi bolsa rekrutamentu (kandidatu) ba profesór sira, iha bolsa kandidatu profesór, iha salaun KFP, Dili, sesta ne’e.

Nia konkorda futuru Komisaun Funsaun Públika nia sistema ezame ho ema númeru boot no bele hetan tan meiu atu sosa ekipamentu, nune’e halo selesaun ba funsionáriu públiku ho númeru boot dala ida de’it.

Ministra Edukasaun, Dulce Soares, hateten ohin Ministériu Edukasaun (ME) servisu hamutuk ho Komisaun Funsaun Públika (KFP) ne’ebé apoiu hosi NONG Belun, halo ona teste eletrónika ba bolsa kandidatu profesór, hahú ohin to’o 16 abríl, sira sei tuir teste loro-loron fazeadamente dadeer ho lorokraik, atu nune’e hosi teste eletrónika ne’e, bainhira sira tuir teste rezultadu sai kedas no bele akompaña.

“Normalmente, antes teste ne’e hahú halo simulasaun ida ba sira, atu nune’e sira hotu bele komprende, oinsá mak sira bele prienxe teste ida-ne’e. Matéria ba teste mak língua portugeza, ingleza, tetún, matemátika, istória, jeografia, siénsia naturál, siénsia sosiál no dezenvolvimentu umanu,” ministra edukasaun ne’e hateten.

Tuir teste iha bolsa kandidatu ida-ne’e, presiza iha bolsa ne’e iha 2.400 no sei halo kolokasaun profesór 1.000 iha inisiu no hafoin sei fó kontinuasaun.

Prezidente Komisaun Funsaun Publika (KFP), Agostinho Letêncio, hateten iha ezame eskrita ne’e Ministériu Edukasaun ho KFP uza sistema internet katak reposta hotu-hotu ne’ebé kandidatu profesór prienxe no save ne’e ema hotu sei asesu.

“Sira teste iha laran, no iha li’ur bele haree, iha ne’e uza internet ne’e. Katak, dadus hotu ka ema nian resposta hotu bele asesu kada momentu nia klik dala ida nia responde númeru ida-nia save,” nia dehan.

Molok profesór sira uza komputadór ne’e ba ezame, nia hateten, sira halo ona simulasaun oinsá uza komputadór ne’e.

Tuir nia, konkursu ida ohin hahú hosi prosesu aplikasaun dokumentu vaga bolsa kandidatu profesór ne’ebé hamutuk 14.152 mak aplika, hosi totál ida-ne’e aplikante admitidu ba teste eskrita eletrónika ne’e hamutuk 13.021.

“Ha’u fó parabens ba profesora (feto) sira-ne’ebé tuir ezame eskrita ba bolsa rekrutamentu (kandidatu) ba profesór ne’e, tanba iha teste ida-ne’e númeru profesór ne’e dominante hosi feto sira,” nia hateten.

Aleinde ne’e, iha mós totál aplikante ne’ebé la admitidu mak hamutuk 1.131 ne’ebé kompostu husi feto hamutuk 678 no mane hamutuk 453.

Totál loron ba teste eskrita ne’e iha loron 22 nia laran, 15 marsu to’o 16 abríl 2024, no kada loron sei hala’o turnu haat mak iha dadeer turnu rua no lorokraik turnu rua, kada turnu dura ba oras rua, ho totál kandidatu 150 kada loron mak sei hala’o teste iha segunda to’o sábadu.

Jornalista : Osória Marques

Editór       : Cancio Ximenes