DILI, 16 marsu 2024 (TATOLI) – Estadu Timor-Leste liuhosi Prezidente Repúblika (PR), José Ramos Horta, parabeniza aniversaáriu eleisaun ba Santu Padre Francisco nian.
“Parabéns husi Timor-Leste ba apóstolu Francisco, hodi hahi’i nia lideransa iha promosaun pás, justisa no fraternidade umanu iha mundu tomak,” Horta hatete iha serimonia aniversáriu ne’ebé hala’o iha Embaixada Santa Sé Faról, sesta kalan.
Notísia relevante:Papa Francisco apela “hamate ahi funu nian-halakan lilin dame nian”
Prezidente Repúblika subliña deklarasaun Abu Dhabi kona-bá Fraternidade Umana iha tinan 2019 nu’udar dokumentu ida-ne’ebé importante tebes iha tempu modernu, ne’ebé Parlamentu Timor-Leste enkuadra ona hanesan prinsípiu orientasaun nasionál ida.
Iha okaziaun ne’e, Horta hato’o ninia esperansa katak Amu Papa Francisco sei vizita Timor-Leste iha tinan ida-ne’e hodi fó nia bénsaun ba nasaun ne’e. Nia fó apresiasaun ba Amu Papa tanba nia umildade, inkluzaun no serbí ba umanidade.
Iha biban hanesan, Primeiru Ministru, Kay Rala Xanana Gusmão mós partisipa hodi hato’o parabéns ba loron importante ne’e.
“Parabéns, sua santidade Papa Fransisco, povu Timor-Leste deseja saúde di’ak no espera ba ansiedade pela sua vizita” PM Xanana hatete hodi entrega prezente fotográfia furak ba Reprezentante Santa Sé Mai Timor-Leste, Mgr. Marco Sprizzi akompaña hosi Prezidente Repúblika, José Ramos-Horta.
Iha oportunidade hanesan, Reprezentante Santa Sé mai Timor-Leste, Mgr. Marco Sprizzi husu ba sarani Timor-Leste kontinua hasa’e nafatin orasaun hodi Papa bele vizita mai Timor-Leste ho susesu.
“Sarani Timor-Leste tenke orgullu, tanba Papa Fransisco aprova ona agenda vizita mai Timor-Leste nu’udar momentu istóriku, tanba Papa Fransisco aseita atu vizita mai Timor-Leste hodi hela durante loron tolu (3) tuir agenda no programa ne’ebé Komisaun Organizadora Vaticano (KOV), Igreja Katolika no Estadu Timor-Leste prepara dadaun ne’e,” nia tenik.
Serimónia ne’e marka prezensa hosi Eis Primeiru-Ministru, Jenerál Taur Matan Ruak, Eis Primeiru-Ministru, Rui Maria de Araújo, Eis Prezidente Parlamentu Nasionál, Aniceto Guterres, korpu diplomatikus sira, padre, madre, membru governu, deputadu, veteranu, komandante F-FDTL, PNTL no entidade setór privadu nasionál no internasionál.
Notísia relevante: Tinan ne’e, Papa Francisco konfirmadu vizita Timor-Leste
Jornalista: Hortêncio Sanchez
Editór: Florencio Miranda Ximenes
