Papa Francisco apela “hamate ahi funu nian-halakan lilin dame nian”
DILI, 12 marsu 2024 (TATOLI)–Reprezentante Vatikanu iha Timor-Leste Núnsiu Apostóliku. Monseñor Marco Sprizzi, hato’o Papa Francico nia mensajen hodi apela ba komunidade musulmanu kona-ba fulan Ramadhan ne’ebé hahú iha 10 marsu ho tema “Kristaun no Musulmanu hamutuk hamate ahi funu nian no ita halakan lilin dame nian”.
Reprezentante vatikanu iha Timor-Leste ne’e hateten, iha kada tinan nia parte ba diretamente iha Meskita hato’o Papa Francisco nia mensajen ba komunidade sira kona-ba fulan Ramadhan ho tema “Apagamos o fogo da guerra e acendemor as velas da paz”.
“Iha tinan ida-ne’e ha’u konvida prezidente konsellu islamiku no membru sira seluk no reprezentante, mai iha nunsiatura apostólika ka emabaixada Santa Sé. Ba hau alegria simu sira atu entrega mensajen Papa nian ba Ramadhan,” Monseñor Marco Sprizzi hateten ba jornalista sira hafoin hala’o enkontru ho prezidente konsellu islamiku no membru sira seluk no reprezentante balun, iha Embaixada Santa Sé iha Motael, tersa ne’e.
Tema “Apagamos o fogo da guerra e acendemor as velas da paz” ba Ramadhan ne’e signifika kataka iha tempu Ramadhan ne’e ema hotu nia esforsu tomak mak sempre ba dame, tanba Papa Francisco hateten funu ema hotu lakon, iha dame ema hotu manan.
Marco Sprizzi konsidera Timor-Leste hanesan roman no faról ida hanesan “paz no iha fraternidade di’ak ne’ebé atribui konvivénsia, amizade entre kristaun katóliku no musulmanu, tanba ida-ne’e mak bele alimenta kovivénsia pasífika no amigavel.
Prezidente Fundasaun Mesjid Annur, Abdullah Said Sagran, hateten fulan Ramadhan ba komunidade islamiku signifika atu aumenta fiar ema ida-idak nian.
“Prepara aan atu hasa’e kapasidade fé. Ema ne’ebé iha fiar di’ak lahalo arbiru, maibé nia sei haree buat ne’ebé di’ak no loos. Ne’eduni, ida-ne’e importante atu hasa’e ita-nia fé no kapasidade umanu nian,” nia hateten.
Relasiona ho Papa Francisco nia mensajen ne’e, sira ko’alia mós kovivénsia komunidade Musulmanu no Katólika iha tempu naruk atu iha relasaun di’ak ho komunidade rua ne’e, no iha dadus istórika kona-ba hadia Meskita Annur iha Kampung Alor.
“Karta ida ohin mai ne’e haforsa tan, mezmuké ami iha ne’e minoria, maibé ami la sente katak iha diskriminasaun ruma. Ami mós envolve iha kampu oioin ba dezenvolvimentu nasaun nian ho prósperu,” nia dehan.
Nia dehan, komunidade Musulmanu mós harii eskola Annur hahú hosi ensinu báziku to’o ensinu sekundariu, ne’ebé oferese ka loke ba ema hotu no maiória alunus katólika hosi estudantes 2.000-resin no profesór sira mós kahor malu, balunkatólika no islamiku.
Importante liután relasaun enrte komunidade rua ne’e, tanba Papa Francisco ho líder islamiku asina mós dokumentu fraternidade umana iha 2019 no Timor-Leste hanesan nasaun ba daruak ne’ebé ratifika ona dokumentu ne’e.
Jornalista : Jesuína Xavier
Editor : Cancio Ximenes
