DILI, 19 marsu 2024 (TATOLI)-Sekretáriu Jerál Asosiasaun Futsál Timor-Leste (AFTL), Fernando Baptista Xavier, hateten prepara hela jogadór selesaun nasionál atu kompete iha kompetisaun Asian Football Federation (AFF) tinan 2024, ne’ebé sei akontese maiu mai ne’e iha nasaun Tailándia.
“Ita agora halo hela preparasaun ba selesaun nasionál futsal nian, jogadór sira ita hili ona hamutuk na’in 32, maibé ita sei halo selesaun ba sira liuliu haree sira ne’ebé iha prestasaun mak ita hili na’in 20 hanesan ne’e,” Fernando hatete ba Agência TATOLI iha Dili, tersa ne’e.
Formasaun ba jogadór sira hahú semana kotuk iha kampo futsál Federasaun Futeból Timor-Leste (FFTL) hahú segunda to’o sesta, durante oras rua mak hanesan tuku 17:00 to’0 19:00.
“Ita nia oráriu treinu segunda to’o sesta, jogadór sira nafatin fó treinamentu hosi treinadór internasionál na’in rua mak Fandy Butar treinadór prinsipál, M Gilang hanesan treinadór fizíku, sira ita kontrata iha tinan kotuk tanba sira nia prestasaun di’ak ita nafatin uza sira,” nia tenik.
Jogu AFF futsal nian sei kompete hosi nasaun hamutuk 10 iha ASEAN hanesan, Singapura, Tailándia, Malázia, Indonézia, Myanmar, Laos, Vietnam, Kamboja, Filipina no Timor-Leste la inklui Brunei Darusalam tanba hetan hela sansaun hosi Federation International Football Asosiation (FIFA).
Notísia relevante: FFTL rekruta treinadór futsál na’in-rua hosi Indonézia
Jornalista: Hortencio Sanchez
Editór : Florencio Miranda Ximenes
