Koordenadór EBF Aimutin husu Governu aselera lei reforma obrigatóriu
DILI, 21 marsu 2024 (TATOLI)–Koordenadór Eskola Báziku Filial (EBF) Aimutin husu Governu atu aselera lei reforma obrigatóriu ne’e atu labele prezudika ba prosesu aprendizajen iha eskola, tanba orifesór ho idade reforma barak mak sei ativu hanorin.
Notísia Relevante: KFP sei aprezenta proposta-lei reforma obrigatóriu ba funsionáriu públiku
“Iha EBF Aimutin ne’e, profesór idade reforma hamutuk na’in-hitu, kompostu hosi feto tolu no mane haat. Ita-nia profesór sira-ne’e ativu nafatin iha prosesu aprendizajen loron-loron nian. Maibé atu dehan sira-ne’e labele ona hanorin ona. Tanba ne’e, Governu presiza aselera lei ne’e,” Koordenadór Eskola Báziku Filial (EBF) Aimutin, Rogério Soares, hateten ba Agencia Tatoli liuhosi telefónika, kinta ne’e.
Koordenadór ne´e hateten, inspetór sira hosi ministériu edukasaun nian mai ona halo inspesaun hodi foti ona dadus maibé seidauk iha rezultadu, nune´e parte eskola sei hein hela lei reforma obrigatóriu ne´e bainhira submete ba Konsellu Ministru atu debate.
“Ita presiza profesór ne’ebé mak forte, ita la’ós la presiza ona sira maibé sira idade ona no presiza deskansa no hein de’it sira-nia subsídiu seguransa sosiál ne’e,” nia dehan.
Profesór na’in hitu ne´e sira-nia idade mesak liu ona idade produtivu mak iha profesór na´in-ida halo ona 62, seluk iha idade 67 no profgesór na´in-ida halo ona idade 69.
Diretór Eskola Tékniku Vokasionál (STM) Becora, Feliciano de Almeida Belo, husu Komisaun Funsaun Públika (KFP) ho Ministériu Edukasaun (ME) atu aselera lei reforma obrigatóriu ba profesór sira idade reforma ne´e.
“Ita iha-ne’e profesór na’in-haat, feto rua no mane rua mak idade avansu ona no ida-ne’e ita bele dehan labele hanorin ona. Ita-nia profesór feto ho mane ida mak idade 70-resin ona no labele ona atu hanorin. Ha’u haruka nia deskansa ona tanba nia sa´e eskada mós labele ona, SE monu ne´e, sé mak responsabiliza ba ida-ne’e, di’ak-liu haruka deskansa,” nia hateten.
Ho ida-ne’e, nia parte halo kedas karta ba Ministériu Edukasaun hodi halo inspesaun maibé laiha rezultadu no hein de’it bainihira mak iha solusaun.
Iha fatin seluk, Diretór Eskola Sekundáriu Jerál 4 Setembru UNAMET, Balide, Martinho de Menezes, hateten iha eskola ne´e profesór idade reforma hamutuk na’in-lima mak sei ativu hanorin.
Notísia Relevante: Komisaun A husu Governu aprezenta proposta-lei reforma obrigatóriu ba FP
Jornalista : Osória Marques
Editór : Cancio Ximenes
