DILI, 25 marsu 2024 (TATOLI) – Ministru Negósiu Estranjeiru no Kooperasaun (MNEK),Bendito Freitas, hasoru malu ho Ministru Negósiu Estranjeiru Emiradus Arabes Unidus (EAU), Omar Shehade, hodi diskute kooperasaun no hametin liutan relasaun bilaterál entre nasaun rua nian.
“Ha’u enkontru ho omólogu mai husi Emiradus Arabe Unidus ne’ebé mak hala’o nia vizita mai iha Timor-Leste, ami ko’alia oinsa hametin liutan ita nia kooperasaun iha área diplomatika nian,” Ministru Bendito hatete liu hosi nota ne’ebé Agência TATOLI asesu husi mídia MNEK, segunda ne’e.
Nia dehan vizita Ministru Omar nian hodi haree no solisita Timor-Leste nia estabelesimentu diplomatika ne’ebé daudaun ne’e la’o maka’as tebes ho EAU.
“Durante nia vizita mai Timor-Leste ne’e sei hasoru malu ho Prezidente Repúblika, Primeiru-Ministru, Vise Primeiru Ministru ne’ebé trata asuntu ekonómiku atu nune’e bele ko’alia kona-ba investimentu no sira hakarak servisu hamutuk ho ita, tulun ita iha área ne’ebé ita presiza, liuliu setór ekonomia ne’ebé ita presiza,” refere nota ne’e.
Rekorda fali katak, relasaun diplomatika entre Timor-Leste ho EAU durante tinan barak ona hahú 2009 to’o agora no ba oin sei hametin liutan hodi servisu hamutuk nune’e bele dudu Timor-Leste nia dezenvolvimentu.
Notísia relevante: PR Horta husu Xina no EAU apoia dezenvolvimentu UNTL
Jornalista: Hortencio Sanchez
Editór: Florencio Miranda Ximenes
