DILI, 25 marsu 2024 (TATOLI) – Prezidente Repúblika, José Ramos Horta simu audénsia husi dirijente másimu Universidade Nasionál Timor Lorosa’e (UNTL), Miguel Martins ho ekipa, iha sorumutuk referidu Xefe Estadu promete sei ko’alia ho nasaun amigu Xina no Emiradu Arabe Unidu (EAU) hodi apoia UNTL nia dezenvolvimentu.
“Xefe Estadu mós sei husu apoia ba nasaun balun liu-liu Xina no UEA hodi iha interese bele apoia dezenvolve UNTL,” tenik Miguel Martins liuhosi nota ne’ebé Agência TATOLI asesu hosi portál facebook Prezidente Repúblika, segunda ne’e.
Durante audénsia, ko’alia mós kona-bá preparasaun tinan 25 ezisténsia UNTL iha ámbitu komemorasaun tinan 50 Proklamasaun Unilaterál Timor-Leste nian ne’ebé husu Xefe Estadu bele partisipa iha selebrasaun referidu, ne’ebé sei realiza iha tempu besik.
Iha parte seluk, kona-bá sidade Universitáriu ne’ebé iha ona mudansa husi Governu atuál, Reitór ne’e informa, Prezidente Horta apoia tebes atu harii sidade universitáriu ne’e no sei husu ba Governu atu tau prioriedade ba infraestutura universidade estatál ne’e.
Tuir nia, durante mandatu tau atensaun ba rekursu umanu liu-liu oinsá atu kaderniza dosente foinsa’e sira inklui mellór graduadu sira atu kontinua estudu liu-liu prepara atu troka dosente ne’ebé tama ona iha idade reforma.
UNTL mak nanis kedan sai hanesan servisu públiku Estadu nian ida no, ema hirak ne’ebé mak hanorin no servisu iha ne’ebá tuir regra husi funsionáriu públiku.
Tan de’it servisu Estadu nian, hala’o Administrasaun Indireta Estadu nian no Estadu mak selu, nia tenke iha duni kapasidade jurídika husi ema koletiva ne’ebé mak iha direitu públiku.
Hanesan servisu Estadu nian hotu, UNTL mós presiza iha baze legal ida no estrutura ida ne’ebé mak kompativel ho natureza ida ne’e, hanesan Dekretu-Lei n.0 2/2008, 16 Janeiro (iha n0. 1 Artigu 6o).
Notísia relevante: UNTL-Universidade Federal de Santa Catarina lansa kursu mestradu ba Edukasaun
Jornalista: Hortencio Sanchez
Editór: Florencio Miranda Ximenes
