DILI, 27 marsu 2024 (TATOLI) – Prezidente Repúblika, José Ramos Horta, agradese ba Estadu Indonézia tanba sai parseiru importante ba Timor-Leste hodi tulun mós dezenvolvimentu nasaun nian.
“Agradese tebes ba Indonézia parseiru ida importante liu ba ita, ita fronteira ho sira hosi aero, terestre, marítima kolaborasaun ida ne’ebé di’ak tebes,” Horta hatete iha Bairru-Pité-Dili, kuarta ne’e.
Nia dehan, labele nega Indonézia nia apoiu durante ne’e ba Timor-Leste hosi área seguransa no tulun mós Timor-Leste nia adezaun ba ASEAN.
“Indonézia apoiu ita koopera di’ak ho ita iha área fronteira, sira mós apoiu maka’as ita hodi adere ba membru permanente ASEAN. Ita nia kooperasaun metin loos, agora sei metin liután ba oin, hanesan nasaun viziñu,” nia katak.
Ho nune’e Timor-Leste kontinua hametin relasaun ho nasaun ne’ebé de’it atu ajuda dezenvolvimentu nasaun nian ba oin.
“Ita agora moris iha hakmatek nia laran, laiha konflitu armadu, laiha guerra sivil, laiha tensaun relijiozu ka étniku. Timor-Leste ita mantein nafatin hanesan illa ida pás iha mundu,” nia katak.
Rekorda fali katak, antes ne’e kooperasaun militár di’ak entre FALINTIL-Forsa Defeza Timor-Leste (F-FDTL) ho Tentara Nasionál Indonézia (TNI).
Asuntu sira ne’ebé diskute relasiona ho defeza-militár nian, liu-liu koperasaun iha área seguransa marítima, formasaun/treinu militár (SesKo, Lemhanas) no kordenasaun entre TNI ho F-FDTL iha ámbitu kontrolu zona fronteira sira, liu-liu iha postu F-FDTL nian iha Tunubibi no Tilomar
Ko’alia kona-ba área marítima nian, Indonézia fo biban ba ofisiál komponente navál hosi Timor-Leste atu haklean sira nia koñesimentu liu hosi formasaun iha SESKOAL (Eskola Komandu Komponente Navál) no formasaun militár nian ho nivél ne’ebé mak a’as liu iha SESKO nomos LEMHANAS ba ofisiál ho postu Major,Tenenti Koronél no Koronél.
Delegasaun F-FDTL nian, inklui mos Xefe Estadu Maior, Komandante Komponente Terrestre no 2º Komandante Komponente Navál, hala’o sorumutu ho Panglima TNI, Jeneral Djoko Santoso, Xefe Estadu Maior nai tolu hosi Indonésia (forsa Terrestre, Marítima no Aéreu), ho Ministru Defeza Indonésia, Purnomo Yusgiantoro, no Komandante Akademia Indonésia, Major Jeneral TNI (MAR) Nono Sampono.
Notísia relevante: Indonézia konvida TL hodi hametin liután relasaun liuhosi Festivál Kupang
Jornalista: Hortencio Sanchez
Editór: Florencio Miranda Ximenes
