Xefe Estadu ho Sekretáriu Jerál ASEAN diskute TL nia adezaun
DILI, 02 abríl 2024 ( TATOLI) – Prezidente Repúblika, José Ramos Horta, tersa ne’e, hasoru malu ho Sekretáriu Jerál ASEAN, Kao Kim Hourn, hodi diskute kona-ba Timor-Leste nia adezaun.
“ASEAN ami iha komprimisiu, ohin ami ko’alia tanba ami hakarak Timor-Leste hola parte ona hanesan membru permanente ASEAN nian,” Kao hatete ba jornalista sira iha Palásiu Prezidensiál Dili, tersa ne’e.
Nia dehan, durante diskusaun parte rua ko’alia kona-ba oinsa Timor-Leste partisipa iha atividade ASEAN nian no oinsa Timor-Leste bele suporta atividade sira hotu.
“Iha ASEAN ami iha komprimisiu hodi hamutuk ho ami, no ami hein reafirmasaun husi Timor-Leste no hein atu bele sai parte ba ASEAN sedu ka tarde. Roadmap ne’e loos ona no iha atividade barak mak tenke implementa hodi hola parte ba ASEAN. ASEAN mós sempre konvida Timor-Leste atu fó nia delegasaun partisipa iha atividade sira, programa oin-oin,” nia konklui.
Rekorda fali katak, iha tinan rua ba kotuk iha nasaun Kamboja membru ASEAN sira simu ona Timor-Leste sai nu’udar membru obserbadór ASEAN.
Iha oportunidade ne’e, Timor-Leste ho orgullu partisipa Simeira ASEAN ba dala 42 iha Labuan Bajo, Provinsia NTT, Indonézia, ne’ebé mak prezide hosi Indonézia.
Prezensa dala uluk Timor-Leste nian hosi eis Primeiru-Ministru Taur Matan Ruak nian iha Simeira ASEAN, ne’e hatudu katak Timor-Leste ofisialmente sai ona membru foun ASEAN ba dala 11 ho estatutu observador enkuantu hein prienxe roteiro hodi sai membru pleno iha tinan sira tuir mai.
Eis Primeiru-Ministru Taur Matan Ruak aproveita, agradese wain ba Lider Nasaun Membru ASEAN sira hotu, espesial ba Prezidente Indonézia Jokowi hanesan Chairman ASEAN ba apoiu tomak simu Timor-Leste sai família foun iha ASEAN.
Nasaun membru ASEAN hamutuk 11 inklui Timor-Leste mak hanesan, Indonézia, Malázia, Singapura, Thailandia, Filipina, Laos, Myanmar, Kamboja, Vietnam no Brunei Darusalam.
Notísia relevante: Timor-Leste adere ba ASEAN vantajen iha ekonomia rejionál
Jornalista: Hortencio Sanchez
Editór: Florencio Miranda Ximenes
