DILI, 03 abríl 2024 (TATOLI)— Prezidente Repúblika, José Ramos-Horta, kuarta ne’e, simu Profesora ida husi Universidade Tokyo, Ai Kihara-Hunt, hodi koa’lia kona-ba prosesu harii dame ne’ebé susesu iha Timor-Leste dezde hetan independénsia.
Iha sorumutuk referidu mós diskute Timor-Leste halo ona esforsu signifikativu hodi harii jerasaun foun ida no dezenvolve ensinu superiór ho apoiu husi parseiru internasionál sira hanesan Japaun. Integrasaun nasaun foun hanesan Timor-Leste ho organizasaun internasionál no komunidade globál nu’udar susesu ne’ebé la’o hela.
“Prosesu harii dame iha Timor-Leste nian hetan susesu boot hodi harii jerasaun foun ida, inklui liuhusi ensinu superiór ne’ebé universidade sira hanesan Universidade Tokyo kontribui ona ba,” dehan Dr. Kihara-Hunt hafoin enkontru ne’e ho Xefe Estadu iha Palasiu Presidensiál, Bairru-Pité,Dili.
Nia dehan: “Ami mós refleta kona-ba Timor-Leste nia pozisaun rekoñesidu hamri’ik ho organizasaun internasionál sira no komunidade internasionál sira, ne’ebé kontinua la’o ba oin ho pozitivu”.
Alende ne’e, ko’alia kona-bá Timor-Leste nia kultura úniku, nia-ema no lideransa husi dekade rua liu ba dezde independénsia.
Profesora ne’e hato’o mós ninia espresaun optimizmu kona-bá kontinuasaun relasaun di’ak entre Timor-Leste no Japaun.
Dr. Kihara-Hunt nu’udar peritu prinsipál ida kona-bá operasaun pás Nasaun Unida nian, reforma setór seguransa, kontabilidade no direitu umanu. Nia servisu maka’as iha nasaun sira hanesan Nepal, Timor-Leste, Sri Lanka, no Bosnia-Herzegovina.
“Ami espera katak ita sei kontinua ita nia relasaun ne’ebé mak kapas tebes. Mensajen ne’ebé mak ha’u simu husi Prezidente Repúblika, mak hanoin kona-bá relasaun entre Timor-Leste no Japaun metin liutan ba oin iha área edukasaun,” nia konklui.
Notísia relevante:Japaun sei harii sentru estudu iha Timor-Leste
Jornalista: Hortencio Sanchez
Editór : Florencio Miranda Ximenes
