Trimestre dahuluk, DRTT Oé-Cusse hatama reseita $26,008.50 ba kofre Estadu
OÉ-CUSSE, 11 abríl 2024 (TATOLI) – Iha trimestre dahuluk, hosi janeiru to’o marsu 2024 ne’e, Diresaun Rejionál Transporte Terrestre (DRTT), Rejiaun Administrativa Espesiál Oé-Cusse Ambeno (RAEOA), rekolla reseita hamutuk $26,008.50 hatama ba kofre Estadu.
“Ita rekolla reseita hahú hosi janeiru to’o marsu 2024 ho totál $26,008.50,” Xefe Departamentu DRTT, Domingos de Almeida, ba jornalista sira iha DRTT Palaban, kinta ne’e.
Notísia relevante:MTK sei integra DRTT Oé-Cusse ba sistema nasionál atu asesu dokumentu orijinál
Almeida, esplika, hosi $26,008.50 ne’e, iha janeiru rekolla $10,968.50, fevereiru $9,395.50 no fulan marsu rekolla $5,644.50.
“Osan ne’ebé ita rekolla mai hosi oin haat, komunidade ne’ebé mai hafoun inspesaun, troka karta kondisaun provizória, hafoun lisensa tránzitu, hanesan angguna, mikrolete, tum-tum, travel, inklui sira-ne’e importasaun karreta, mai rejista hatama reseita ba kofre Estadu,” nia informa.
Durante ne’e parte DRTT nafatin liña koordenasaun servisu la’o di’ak ho PNTL sesaun tránzitu tanba entre ligasaun ho dokumentu transporte sira.
“Ne’e maka iha tempu badak, ami sei rejistu motorizada sira-ne’ebé laiha dokumentu, tanba foin daudaun Prezidente Autoridade fó ona despaxu, ne’ebé ami agora iha ona koordenasaun entre alfándega DRTT no PNTL,” nia katak.
Iha biban ne’e, António Elo da Conceição, nu’udar Oé-Cusse oan, rekomenda ba Autoridade RAEOA, presiza buka solusaun ba dokumentu transporte sira, tanba tinan 10 ona, seidauk iha orijinál, no fasil ba sidadaun balu bele halo falsifikasaun.
“Populasaun sira kontribui maka’as ba reseita no koopera nafatin, maibé dokumentu sira-ne’ebé iha, la’ós dokumentu auténtiku, provizóriu mak barak, ne’e maka ha’u sujere, atu evita falsifikasuan dokumentu, di’akliu autoridade tenke hanoin ona, tanba durante tinan 10 ona Oé-Cusse moris ho karta provizória de’it,” nia fó hanoin.
Notísia relevante: DRTT Oé-Cusse presiza aumenta rekursu umanu no fasilidade
Entretantu, antes ne’e, Ministériu Transporte no Komunikasaun (MTK), hala’o ona vizita atu entegra DRTT Oé-Cusse ba fali sistema Nasionál Transporte Trerrestre (DNTT), nune’e bele asesu ona karta kondusaun no livrete ho tipu orijinál hodi lalakon logo ZEESM iha dokumentu transporte sira.
Jornalista: Abílio Elo Nini
Editór: Evaristo Soares Martins
