Estudante 132 iha Oé-Cusse nu’udar kandidatu asesu bolsa estudu veteranu
OÉ-CUSSE, 12 abríl 2024 (TATOLI) – Estudante hamutuk na’in-132 iha Rejiaun Administrativa Espesiál Oé-Cusse Ambeno (RAEOA), daudaun ne’e rejista ona naran no submete mós dokumentu komprovativu sira iha Konsellu Munisipál Kombatente Libertasaun Nasionál, (CMCLN, sigla portugés) Oé-Cusse atu asesu ba bolsa estudu veteranu nian.
“Rezultadu kandidatu, ne’ebé mai rejista ona iha ne’e, na’in-132 hosi nível ensinu báziku to’o ensinu superiór, maibé barak liu maka ensinu superiór,” Prezidente CMCLN Oé-Cusse, Venâncio Lafo, ba Agência Tatoli iha Oé-Cusse, sesta ne’e.
Notísia relevante: Governu presiza veteranu nia oan 100 iha Oé-Cusse atu asesu bolsa estudu
Prezidente CMCLN, Oé-Cusse, esplika, rejime atribuisaun bolsa estudu ne’e, espesialmente ba knombatente no mártir sira-nia oan, ne’ebé loke hosi Ministériu Asuntu Kombatente Libertasaun Nasionál (MAKLN), ho baze dekretu-lei númeru 8/2009, loron 15, fulan-janeiru.
Nia informa, prosesu inskrisaun hahú loke iha Oé-Cusse, iha loron 05 marsu to’o loron 03 abríl 2024 no tarjetu hosi MAKLN ba Oé-Cusse presiza 100.
Hosi númeru ne’e, eskola ensinu báziku primeiru siklu persiza na’in-lima (5), segundu no terseiru siklu presiza na’in-15, ba ensinu sekundáriu jerál no tékniku vokasionál presiza na’in-25, no ensinu superiór universitáriu rai laran presiza na’in-50 ba rai-li’ur presiza na’in-lima (5).
“Maibé rezultadu liu, agora ema na’in-32, barakliu mai hosi ensinu superiór, ne’e maka na’in-132,” nia katak.
Nia dehan, rezultadu klasifikasaun finál, sei fó sai iha fulan-setembru 2024, tanba avaliasaun bazea dokumentu komprovativu no valór ezame finál nian.
“Ekipa hosi Konsellu Veteranu lori ona sira-nia dokumentu ba iha nasionál, tanba nasionál mak sei avalia direita no rezultadu sei fó-sai iha setembru 2024,” nia informa.
Notísia relevante: MAKLN prevee millaun $1,1 hodi fó bolsa estudu ba veteranu nia oan
Entretantu bazea livru 3-C, Orsamentu Jerál Estadu (OJE) 2023 RAEOA-ZEESM Timor-Leste nian, haktuir benefisiáriu ne’ebé hetan apoiu osan Estadu iha RAEOA ba kombatente ka veteranu libertasaun nasionál hamutuk ema na’in-363, no mártir libertasaun nasionál hamutuk ema na’in-223.
Jornalista : Abílio Elo Nini
Editór : Evaristo Soares Martins
