iklan

DILI

MDF-AHTL promove produtu turístiku lokál

MDF-AHTL promove produtu turístiku lokál

Grupo Leziaval uza Tais hodi aprezenta dansa tradisionál iha abertura expozisaun permanenti Tais ne’ebé organiza husi gabinete Sekretáriu Estadu arte no kultura, iha arredór SEAK, Praia dos coqueiros, Dili, hodi promove soru inan sira, sesta (25/08/). Imajen TATOLI/António Daciparu

DILI, 12 abril 2024 (TATOLI)–Fasilidade Dezenvolvimentu Merkadu (MDF, sigla inglés) no Asosiasaun Hotel Timor Lorosa’e (AHTL) promove produtu inovativu turístiku lokál iha Timor Plaza.

Asesór ba Negósiu husi MDF, Fabio de Carvalho, hateten atu introdús produtu turísiíku lokál husi empreza lokál ba ajénsia operadór turístiku sira hodi bele tau hamutuk iha pakote vizita turístiku iha Timor-Leste.

“Hosi promosaun ne’e sira promove produtulokal sira hanesan cokolate, tua lokál, korxe, transformasaun tais ba pasta no asesoria sira hanesan porta moeda, porta xave, no hahan sira seluk iha eventu ne’e,” nia dehan iha Timor Plaza.

Iha promosaun agensia viajen MAF, panfletu sira ba fatin turístika hanesan Balibo Trail, ajénsia telekomunikasaun Telemor no Banku Nasionál Ultramarinu (BNU).

Nia hateten, MDF apoia no fasilita empreza lokál sira hodi bele aprezenta sira-nia produtu inovativu ba komunidade turizmu sira iha ne’e hodi sira bele hatene produtu hanesan Tais no negósiu ba Motor Bike and Rent no seluk tan.

“Ema barak seidauk hatene empreza lokal sira ne’e, entaun ita tenta introdús hela ba sira hodi inkorpora iha sira pakote tour nian, bainhira mai vizita Timor-Leste,” nia hateten.

Nia garante, MDF iha estratéjia rua hodi promove Timor-Leste mak hanesan turizmu tasi nian no promove produtu inovativu ba turista sira.

Tuir nia, Timor-Leste sei iha turizmu kulturál no istória kolonialzsmu ho Indonézia no nasaun seluk hodi bele promove mós iha futuru.

Prezidente AHTL, Jeremiah Chan, hateten AHTL no MDF promove produtu inovativu timoroan nian iha Timor-Leste ba dahuluk.

“Ohin loron, ami organiza sira-ne’ebé iha Motor Bike and Rent ka hahan lokál no ajénsia operadór turista sira bele inklui iha sira matadalan atu tau hamutuk sai pakote ida, hodi hatene katak Timor-Leste nu’udar nasaun destinu ba turista,” nia dehan.

Nia esplika, eventu ba promosaun produtu inovativu sai hanesan kriasaun rede entre operadór turistiku no empreza lokál sira atu kria ligasaun no pakote ida ba turista sira.

Bainhira operadór turista sira lakoñese empreza lokál sira hanesan Balibo Trail, produtu lokál, entaun defisil ba Jaco ka Balibó, entaun susar ba ema tanba ne’e mak sira organiza eventu hodi kria rede.

Eventu ne’e, sei realiza ba futuru hodi promove mos produtu sira hanesan foos no seluk tan.

Tuir nia, Timor-Leste kontinua enfrenta dezafiu mak hanesan ema seidauk hatene katak Timor-Leste sai nasaun destinasaun ba turizmu, turista sira sei susar mai tanba seidauk iha empreza hodi kria pakote turístiku.

Reprezentante Pro-Ema, Olivia Xavier Amaral, hateten sente kontente bele partisipa iha eventu promosaun produtu inovativu turístiku.

“Liuhosi eventu ne’e ami aprezenta ami-nia produtu lokál Cokolate hodi turista sira bele koñese ita-nia produtu. Ita-nia maluk timoroan móos partisipa no ita móos bele koñese malu,” nia dehan.

Empreza lokál hamutuk 15 mak kompostu hosi Water Leste, Suku Kreativu Aileu, Balibo Trail, Timor Motor Bike and Rent, Pau de Canela, Delicios Timor, MAF, Rolls and Books, Spirit of Timor (SOT), Rede Soru, Reloka Timor, Maddog Adventure, Event2, Pro-Ema no Telemor.

Jornalista : Jesuína Xavier

Editor       : Cancio Ximenes

 

iklan
iklan

Leave a Reply

iklan
error: Content is protected !!