DILI, 17 abríl 2024 (TATOLI)–Estudante Eskola Ensinu Sekundáriu Jerál (ESJ) 4 Setembru UNAMET Balide no Eskola CAFÉ Taibesi sei kompete iha konkursu hakerek kreativu lian portugés iha 5 maiu 2024, tanba eslkola rua referida sai modelu ba grupu Amiga Comunidade das Paises Lingua Portuguesa (CPLP).
Kompetisaun ne’e hala´o hodi selebra loron mundiál ba lian portugés ne´ebé kada tinan selebra iha loron 05 de Maiu.
“Estudante ESJ 4 Setembru hamutuk na’in-hitu (7), feto neen no mane ida, maibé na’in-rua mak hatama ona testu. Ha’u seidauk haruka ba Ministériu Edukasaun tanba testu ne’e ami sei haree hela. Sira na’in-lima seluk, ami hein to’o agora seidauk manda mai maibé to’o aban mak la haruka testu, entaun na’in-rua (Efrem & Jorgina) mak sei reprezenta ESJ 4 Setembru nian hodi kompete ba konkursu kreativu hakerek iha nasionál no internasionál,” Responsável Formasaun Konkursu Lian Portugés, Eskola Sekundáriu 4 Setembru UNAMET Balidei, Norberto da Costa, hateten ba Agência Tatoli iha nia kna’ar fatin Balide, kuarta ne’e.
Konkursu ba nasionál ne’e estudante sira sei konkorre iha Ministériu Edukasaun (ME) no konkursu ba internasionál ne´e mak sei kompete ho estudante sira hosi iha nasaun membru Comunidade das Paises Lingua Portuguesa (CPLP).
“Sira-ne’ebé hetan primeiru lugar ne´e sei ba compete iha CPLP no terseiru eh segundu lugar mak sei compete iha Timor-Leste de’it. Entaun ho ida-ne’e, preparasaun ne’ebé ha’u halo mak haruka estudante sira hakerek poema ho lian portugés no inglés, lee poema ho lian portugés no inglés, drama ho lian portugés no inglés, dansa kulturál. Dansa kulturál ne’e ami aprende hosi Nasaun Portugal, Guiné Bissau no Brasil. Aleinde ne’e halo diskusaun entre estudante ho lian portugés no inglés, inklui halo jornál parede,” nia esplika.
Estudante ne’ebé kompete ne’e, nia hateten, laharee ba valór maibé manorin sira halo avizu estudante désimu anu sira-nian, sé mak iha interrese no vontade konkore ba konkursu hakerek kreativu ne´e.
“Ikus ita-nia estudante besik na’in-20 mak rejistu maibé na’in-hitu (7) de’it mak iha interrese hodi kompete. Maibé, antes ne’e ha’u mós halo entrevista sira ho lian portugés, nune’e ita bele hateten sira-nia kapasidade hakerek, ko’alia no pronúnsia,” nia dehan.
Kompetisaun ne’e, Ministériu Edukasaun lansa ona iha semana kotuk liubá.
Xefe Gabinete Ministra Paula Corte Real Araújo, hatete Eskola CAFE no ESJ 4 Setembru UNAMET mak sai hanesan pilotu no husu ba estudante sira atu iha korajen hodi bele kompete ba konkursu hakerek kreativa.
“Rekomenda ba estudante sira katak sira-nia esforsu no vontade atu kompete ba iha konkursu ne’e, hodi bele foti eskola ne’e ninia imajen. Aleinde liuhusi konkursu hakerek kreativa ita bele koiñese ona alunu sira-ne’ebé iha koñesementu di’ak, nune’e ba futuru bele kapasita sira,” nia dehan.
Totál estudante ne’ebé konkore ba konkursu hakerek kreativa ne’e hamutuk na’in-22, husi Eskola CAFE na’in15 no Eskola ESJ 4 Setembru UNAMET na’in-hitu (7).
Jornalista : Osória Marques
Editór : Cancio Ximenes
