DILI, 19 abríl 2024 (TATOLI)— Diretora Nasionál Dezenvolvimentu Turístika, Ministériu Turizmu no Ambiente, Rosita Garcia de Sousa informa katak iha fulan-maiu, Ministériu Turizmu no Ambiente sei konstrui praia Kaitehu iha Aldeia Mota ikun, Suku Mota Ulun, Postu administrativu Bazartete, Munisípiu Liquiça.
“Iha fulan-maiu ita sei konstrui no dezenvolve fatin; Praia dos Coqueiros, iha Kaitehu Liquiça nune’e dada turista sira no vizitante sira ba iha fatin referidu,” Rosita Garcia de Sousa, informa ba TATOLI iha-nia kna’ar fatin MTA Farol, ohin.
Nia dehan, rai ne’ebé mak atu halo konstrusaun ba praia Kaitehu ne’e nia distánsia naruk purvolta 2 ektár hodi prepara ba fatin turizmu nian.
“Ita foti zona primeiru iha ne’ebá, ita prepara gazebo no restaurante ki’ik sira, haris-fatin públiku, fatin ba halimar labarik nian. Entaun, ida-ne’e mak sei faze primeiru,” nia relata.
Ezekutiva ne’e esplika, praia Kaitehu ne’e Governu sei halo étapa ba étapa, tanba ne’e mak daudaun ne’e iha ona faze aprovizionamentu.
“Agora daudaun sitiu Praia dos Coqueiros Kaitehu ne’e iha ona faze aprovizionamentu, espera katak iha fulan-maiu obra bele la’o ona,” nia haktuir.
Iha fatin hanesan, Diretór Arovizionamentu iha Ministériu Turizmu no Ambiente, Lucio Babo, informa, iha fulan-maiu halo ona kontratu ho empreza sira atu halo kontrusaun ba sitiu praia Kaitehu, Liquiça.
“Agora ita la loke konkursu ba públiku tanba ita-nia orsamentu mínimu, nune’e ita halo ajudikasaun direita de’it ba empreza timoroan sira atu halo konstrusaun ba sítiu Kaitehu ida-ne’e,” Lucio Babo afirma.
Entertantu, orsamentu ba Kontrusaun praia dos Coqueiros Kaitehu, Liquiça, tinan-ne’e MTA liuhusi Diresaun Nasionál Dezenvolvimentu Turístika prevee hamutuk 295 mil.
Jornalista : Felicidade Ximenes
Editór: Rafael Ximenes de A. Belo
