VIQUEQUE, 24 abríl 2024 (TATOLI)- Sekretáriu Ezekutivu Konsellu Kombatente Libertasaun Nasionál (CCLN, sigla portugés) munisípiu Viqueque, Daniel Sarmento “Fogete”, informa veteranu no kombatente libertasaun nasionál nia-oan hamutuk 336 mak konkorre ona konkursu públiku bolsa estudu.
“Ami simu kandidatu bolsa estudu husi veteranu oan hamutuk 336, maibé vaga ba Viqueuqe presiza ema na’in-100 ne’ebé númeru boot liu. Nune’e sei halo selesaun ba valór kada estudante sira-nia”, Sekretáriu CCLN ne’e hatete ba Agência TATOLI, iha ninia kna’ar fatin antiga komarka Viqueque Vila, ohin.
Prosesu rejista kandidatu bolsa estudu hahú iha loron 5 marsu to’o loron 13 abríl 2024.
Daudaun, nia dehan dokumentu ne’ebé kandidatu bolsa sira hatama submete kedan ba Governu liuhosi Ministériu Kombatente Libertasaun Nasionál hodi halo korresaun.
“Prosesu selesaun ba valór ne’e sei finaliza iha Setembru 2024 no komesa taka sai ona naran no transfere orsamentu ba sira nia-konta. Maibé, ha’u husu ba veteranu oan sira-ne’ebé liu selesaun asesu ba bolsa estudu iha tinan ida-ne’e tenke uza osan ba nesesidade eskola labele uza ba buat seluk ne’ebé la’ós relevante ba eskola”, nia sujere.
Tuir dadús estudante veteranu oan ne’ebé konkorre ho totál 336, kompostu hosi ba ensinu báziku, segudu no terseiru siklu, sekundáriu, universidade iha laran no rai-li’ur iha kandidatu hamutuk 100.
Husi númeru ne’e sei fahe ba kada bolsa estudu hanesan ensinu báziku vaga lima, segundu no terseiru siklu 15, sekundáriu 25, universidade rai laran na’in-50 no universidade rai li’ur na’in-lima.
Konkursu referidu ba veterau no kombatente nia-oan sira ne’ebé ho grau sira hanesan 8 a 14, 15 a 19, 20 a 24.
Tuir dadús kombatente munisípiu Viqueque-oan sira-ne’ebé asesu ona bolsa husi iha tinan 2023 na’in-271, maibé vaga ne’e presiza de’it 165, asesu ba universidade rai laran 70, universidade rai li’ut na’in-lima, sekundáriu na’in 50 no segundu no terseiru siklu 30, primeiru siklu na’in 10 maka tinan kontu asesu ona vaga ne’e.
Notísia relevante:CCLN Viqueque husu veteranu nia oan sira konkorre konkursu bolsa Estudu
Jornalista : Vitorino Lopes da Costa
Editór : Florencio Miranda Ximenes
