Federasaun hili de’it Boxista ba joga iha Kazakhstan
DILI, 24 abríl 2024 (TATOLI) – Prezidente klube Boxe El-Matador Abilio Orlando dos Santos, sente triste ba desizaun Federasaun Boxe Amadora Timor-Leste (FBATL) ne’ebé latuir regra normál Boxe nian, bainhira haruka Boxista sira ba joga iha Kazakhstan.
“Ami hanesan klube sente triste ba federasaun, Boxista barak mak iha talentu maibé sira hili fali sira-nia família mak ba tuir kompetisaun iha nivel internasionál. Sira hili de’it Boxista na’in-tolu U-21 hodi ba tuir eventu IBA iha Kazakhstan-2024”, Abilio hatete ba Agência TATOLI iha Dili, ohin.
Nia dehan, jogadór hotu merese atu ba tuir kompetisaun saida de’it, maibé tenke tuir kritéria hanesan selesaun.
“Jogadór hotu bele ba tuir kompetisaun saida de’it, maibé tenke liuhosi prosesu selesaun. Iha selesaun mak ita foin deside se mak atu ba, atu ba mós tenke iha preparasaun no kondisaun, treinu tenke ho programa, tenke halo try out, tau Boxista sira iha kajerna antes aranka, se la’e Governu lakon osan saugati de’it. Tempu to’o ona atu ita ba kompete la’os ba pasiar de’it”, nia katak.
Boxista na’in tolu ne’ebé aranka ona ba Kzakhstan mak Antonio da Silva, sei joga iha klase 48kg, Dovi Ramos joga iha klase 54kg no Cheva Henrique joga iha klase 51kg ne’ebé akompañamentu husi ofisiál na’in-rua mak hanesan, Benjamin Alves de Assis no Victor Tales.
Hatan ba kestaun ne’e, Sekretáriu Jerál FBATL Rogerio Amaral Soares, afirma atleta na’in-tolu ne’ebé aranka ba jogu internasionál ne’e rekomenda husi Diretór Tékniku FBATL.
“Sira ne’ebé atu ba ne’e rekomenda husi Diretór Tékniku Federasaun nian, tanba sira mak halo avaliasaun ba jogu boxe nian iha tinan 2022 ne’ebé hala’o iha Estádiu Munisipál Dili. Sira ne’ebé hili tanba iha jogu hala’o iha estádiu ne’e hatudu prestasaun di’ak, sira ne’e la’os seniór maibé sira juniór. Se klube sira balun dehan la liu fali husi selesaun ne’e oinsa, se ita ba bolu de’it atleta sira nunka tuir jogu mak ba ne’e mak sala”, Rogerio hatete.
Tuir nia, konvite ne’ebé mai husi IBA ba kompetisaun ne’e urjente uitoan ho nune’e federasaun hili de’it atleta ne’ebé antes ne’e iha ona prestasaun iha kampionatu nasionál ne’ebé realiza iha Estádiu Munisipál Dili.
“Ita iha tinan ne’e seidauk realiza kampionatu nasionál, entaun ita hili atleta sira ne’e, halo selesaun ba atleta ne’e tenke liu husi kampionatu nasionál, lolos tinan ne’e iha kampionatu nasionál halo ona iha fulan-marsu maibé Ministru Juventude Desportu Arte Kultura mak husu muda ba fulan-Maiu, entaun labele, dalan seluk mak ita hili sira ne’ebé iha tinan kotuk hatudu prestasaun ne’e”, nia esplika.
Iha sorin seluk, Diretór Nasionál Desportu Federadu MJDAK Oscar Dias Quintas, rekorda FBATL antes hato’o proposta ba Governu atu apoiu osan hamutuk $18.000, atu bele apoiu ba atleta nasionál na’in-tolu ba tuir kompetisaun iha Kazakhstan.
“Sira haruka duni proposta mai ami atu Governu apoiu orsamentu hamutuk $18.000 ba Federasaun Boxe atu lori atleta na’in-tolu ba tuir kompetisaun iha Kazakhstan, ami haree sira-nia proposta no ami hatun ba $14.000 no osan transfere ona ba sira”, nia katak
Notísia relevante : MJDAK konsidera FBATL-CONTL menus esperiénsia afeta ba Boxista TL
Jornalista: Hortencio Sanchez
Editór : Zezito Silva
