DILI, 03 outubru 2023 (TATOLI) – Ministru Juventude Desportu Arte no Kultura (MJDAK) Nélio Isaac Armento, konsidera estrutura Federasaun Boxe Amadora Timor-Leste (FBATL) ho Komité Olímpiku Nasionál Timor-Leste (CONTL, sigla portugés) menus esperiénsia hodi afeta ba boxista na’in-haat ne’ebé la konsege kompete iha Asian Games iha Xina.
“Boxe la partisipa ne’e la’os tanba atleta na’in-haat ne’e la preparadu, maibé tanba kestaun administrativu no tékniku kona-ba regra no prosedurál jogu nian”, Ministru Nélio ba jornalista sira iha Palásiu Governu foin lais.
Nia salienta, regra ne’ebé impede atleta sira-nia partisipasaun mak FBATL no CONTL la kompleta dokumentu kona-ba saúde Boxista nian.
“Ita hakarak hatene se mak organiza jogu Boxe iha Asian Games, ne’e Komité Olímpiku Azia mak organiza jogu ne’e, tanba organizasaun mundiál Boxe nian iha problema oituan, sira dualizmu hela, ho nune’e mak agora daudaun Boxe internasionál la halo kompetisaun Boxe internasionál, ho ida-ne’e mak jogu Boxe ne’ebé hala’o iha Asian Games no Olimpiade atu hala’o tinan oin iha Paris ne’e, Komité Olímpiku Asian mak organiza”, nia adianta.
Tanba ne’e mak Boxista sira tenke hatudu sira-nia dokumentu médiku kona-ba livre hosi moras ne’ebé internasionál hatún mai hanesan, livre hosi moras tuberkuloze, tenke livre hosi moras hepatitis, tenke livre hosi HIV, tenke iha mós sertifikadu anti-doping.
“Buat sira-ne’e hotu ita la aprezenta ba Komité Olímpiku internasionál Asia nian mak prezudika sira na’in haat la tuir kompetisaun ne’e”, nia relata.
Tuir ministru, Asian Games hanesan parte ida pra-kualifikasaun ba Boxe sira hetan kualifikasaun di’ak, automatikamente hakat liubá kompete iha jogu Olímpiku internasionál ne’ebé sei hala’o iha Fransa Paris tinan oin.
Ho problema inkompetivu modalidade boxe, Agência TATOLI tenta kontaktu ho lider másimu FBATL no responsavel CONTL hanesan mós Xefe delegasaun ba jogu Asian maibé ladauk fó resposta to’o ohin loron.
Maske Timor-Leste iha modalidade Boxe la partisipa eventu ne’e maibé to’o agora estrutura no atleta Boxe seidauk fila mai Timor-Leste.
Tuir informasaun ne’ebé iha, ekipa Boxe sei fila hamutuk ho ekipa delegasaun tanba Otel no fatin hotu halo ona pagamentu, se bainhira sira fila mak osan sira selu fatin no billete aviaun saugati de’it.
Notísia relevante : Asian Games-Modalidade Boxe Timor-Leste diskualifika tanba CONTL
Asian Games-Xanana kongratula Xina promove pás entre nasaun no atleta
Despede atleta Asian Games, Xanana komprometidu dezenvolve desportu
PM Xanana no delegasaun desloka bá Xina partisipa Asian Games
Prezidente Repúblika husu atleta Asian Games hatudu jogu ho umilde
Natasaun prepara kompete Asian Games 2023 iha Xina
Jornalista: Hortencio Sanchez
Editór : Zezito Silva
