PAM Bobonaro orienta DTP identifika rai no uma Estadu
BOBONARO, 26 abríl 2024 (TATOLI)-Prezidente Autóridade Munisipál (PAM) Bobonaro, Alexandrino Pires, fó ona orientasaun ba Diresaun Terra no Propriedade (DTP) atu indetifika rai no uma Estadu ne’ebé Estadu Portugál ho Indonézia inklui sidadaun estranjeiru sira husik hela hafoin Timor-Leste ukun-an, nune’e ba futuru bele jere no administra.
Programa ne’e hanesan faze preparasaun atu hasoru eleisaun kámara munisipál, nune’e ba futuru Autoridade Munisipál bele regulariza sidadaun ne’ebé okupa rai no uma Estadu tenke selu taxa kada fulan.
Notísia Relevante:MJ orienta DTP Bobonaro identifika rai no uma Estadu
“Ha’u orienta ona ba Terras atu indetifika uma ho rai Estadu ne’ebé ita-nia inan-aman sira okupa, ita tenke ser hahú ona taxa, tanba ita prepara-an atu ba kámara munisípiu, tinan rua mai ita tenke ser hakat ba eleisaun prezidente kámara munisípiu,” nia hateten.
Nia afirma, iha tempu badak sei halo karta ba Ministériu Finansa atu loke konta bankária munisípiu Bobonaro.
“Atu nune’e bainhira ita selu taxa, buat sira-ne’e tama direita ba konta bankária munisípiu nian,” nia tenik.
Enkuantu tuir dadus ne’ebé DTP munisípiu Bobonaro iha tinan 2023, iha sidadaun timoroan no estranjeiru ne’ebé okupa rai no uma Estadu hamutuk ema na’in-100 mak kumpri devér selu arrendamentu.
Notísia relevante: DTP sei hahú identifika rai no uma estadu iha Maliana
Jornalista: Sérgio da Cruz
Editór: Evaristo Soares Martins
